Bas ımamdardyń dıplomdary kúmándi – Jýrnalıst mınıstrge saýal qoıdy

Belgili jýrnalıst Oraz Álimbekov Ǵylym jáne joǵary bilim mınıstri Saıasat Nurbektiń vıdeosyn bólisip, mınıstrge saýal joldady, dep habarlaıdy Skifnews.kz aqparat portaly.

Vıdeoda mınıstr jalǵan qujat jasatqandardyń 2 jylǵa deıin bas bostandyǵy shekteletini nemese aıyrylatynyn, al qaıtalanǵan jaǵdaıda 4 jylǵa jaza kesiletinin túsindirip tur.

Osy aıtylǵandy alǵa tartqan jýrnalıst «Bas múftıdiń dıplomyn qashan tekseredi?» degen suraq qoıyp, biraz ımamnyń dıplomdaryna kúmánmen qaraıtynyn jetkizdi.

Mınıstr Saıasat Nurbek 1991 jyldan bastap berilgen dıplomdardy tekserip, jalǵan dıplom ıelerin jazaǵa tartpaqshy. Men buǵan deıin Bas múftı Naýryzbaı О́tpenov pen kemi úsh qalanyń (Astana, Almaty, Shymkent) bas ımamdarynyń dıplomdary kúmándi ekenin dáleldep jazǵanmyn. Tipti, Naýryzbaı О́tpenovtiń doktor dárejesin alýy da kúmándi. Ol basqa qalada tolyq stavkada jumys istegen, al ózi myń shaqyrym alystaǵy qalada doktorantýra oqyǵan…

Mınıstr osyndaı jalǵan dıplomdy paıdaǵa asyryp júrgen qýaıaqtardyń 2 jylǵa sottalatynyn aıtty. Onyń sózi ras bolsa, jaqyn arada sottyń aıyptalýshylar oryndyǵynan sálde taqqan moldalardy da kórip qalamyz, qudaqalasa, – dep boljam jasady jýrnalıst.