جاڭالىقتار
باس ءمۇفتيدىڭ ساپارىنا بايلانىستى تۇركىستان وبلىسىنداعى يمامداردان اقشا جينالعانى تۋرالى اقپارات تارادى
فوتو: قمدب
قازاقستان مۇسىلماندارى ءدىني باسقارماسى باس ءمۇفتيدىڭ ساپارىنا بايلانىستى تۇركىستان وبلىسىنداعى يمامداردان اقشا جينالعانىن جوققا شىعارادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
الەۋمەتتىك جەلىلەردە بوپسالاۋ تۋرالى اقپارات پايدا بولعاننان كەيىن, قازاقستان مۇسىلماندارى ءدىني باسقارماسى بولعان وقيعانىڭ بارلىق ءمان-جايىن انىقتاۋ ءۇشىن ارنايى كوميسسيا قۇردى. كوميسسيا مۇشەلەرى تۇركىستانعا بارىپ, تاعىلعان ايىپتار بويىنشا تەكسەرۋ جۇرگىزدى.
«تۇركىستان وبلىسىندا باس مۇفتيدىڭ كەلۋىمەن بايلانىستى يمامداردان اقشا جيناۋ فاكتىلەرى تىركەلمەگەن. Kaspi Gold ارقىلى اۋدارىلعان اقشا قاراجاتتارى دەمەۋشىلەر تاراپىنان بەرىلگەن جانە ولار قايىرىمدىلىق شارالارىنا, يفتار ۇيىمداستىرۋعا, قۇران وقۋ بويىنشا رەسپۋبليكالىق بايقاۋدى وتكىزۋگە, كونفەرەنتسيالاردى ۇيىمداستىرۋعا, ءباسپاسوز باسىلىمدارىنا جازىلىمعا جانە باسقا دا باستامالارعا باعىتتالعان. اتتەستاتسيالىق كوميسسيا مۇشەلەرىنە اقشا جيناۋ جانە گونورار تولەۋ فاكتىلەرى انىقتالعان جوق», – دەلىنگەن مالىمدەمەدە.
باس ءمۇفتيدىڭ ساپارىمەن بايلانىستى شىعىندار تولىقتاي باسقارما ەسەبىنەن تولەنگەن. وبلىستىق مەشىتتىڭ كىرىستەرى مەن شىعىستارى مۇقيات تەكسەرىلىپ, زاڭ بۇزۋشىلىقتار مەن قارجى قاراجاتتارىنىڭ ماقساتسىز پايدالانىلۋى انىقتالماعانى ايتىلدى.
ەسكە سالايىق, بۇعان دەيىن تۇركىستان وبلىسىنىڭ باس يمامى ەرجان تولەپوۆكە قاتىستى داۋعا بايلانىستى الەۋمەتتىك جەلىلەردە باس يمامنىڭ اۋدان مەن قالا مەشىتتەرىنىڭ يمامدارىنان ءماجبۇرلى تۇردە اقشا جيناعانى تۋرالى اقپارات تارادى. جەلىدە باس ءمۇفتي ناۋرىزباي قاجى تاعان ۇلىنىڭ تۇركىستانعا ساپارى ءۇشىن قاراجات جيناۋ تۋرالى مالىمەتتەر مەن تۇبىرتەكتەر جاريالاندى. الايدا تولەپوۆ بۇل اقپاراتتى جوققا شىعارىپ, يمامدار گازەت-جۋرنالدارعا جازىلۋ ءۇشىن اقشانى وزىنە اۋدارعانىن ايتتى. ول جاعدايعا ءتۇسىندىرۋ جۇمىستارىن جۇرگىزگەنىن جانە اۆتوردىڭ ارەكەتىنە مورالدىق جاۋاپكەرشىلىك جۇكتەلەتىنىن مالىمدەدى.
