Jańalyqtar
Bas múftıdiń saparyna baılanysty Túrkistan oblysyndaǵy ımamdardan aqsha jınalǵany týraly aqparat tarady
Foto: QMDB
Qazaqstan musylmandary dinı basqarmasy bas múftıdiń saparyna baılanysty Túrkistan oblysyndaǵy ımamdardan aqsha jınalǵanyn joqqa shyǵarady. Bul týraly qandastar.kz Stan.kz aqparat agenttigine silteme jasap habarlaıdy.
Áleýmettik jelilerde bopsalaý týraly aqparat paıda bolǵannan keıin, Qazaqstan musylmandary dinı basqarmasy bolǵan oqıǵanyń barlyq mán-jaıyn anyqtaý úshin arnaıy komıssııa qurdy. Komıssııa músheleri Túrkistanǵa baryp, taǵylǵan aıyptar boıynsha tekserý júrgizdi.
«Túrkistan oblysynda bas múftıdiń kelýimen baılanysty ımamdardan aqsha jınaý faktileri tirkelmegen. Kaspi Gold arqyly aýdarylǵan aqsha qarajattary demeýshiler tarapynan berilgen jáne olar qaıyrymdylyq sharalaryna, ıftar uıymdastyrýǵa, Quran oqý boıynsha respýblıkalyq baıqaýdy ótkizýge, konferenııalardy uıymdastyrýǵa, baspasóz basylymdaryna jazylymǵa jáne basqa da bastamalarǵa baǵyttalǵan. Attestaııalyq komıssııa múshelerine aqsha jınaý jáne gonorar tóleý faktileri anyqtalǵan joq», – delingen málimdemede.
Bas múftıdiń saparymen baılanysty shyǵyndar tolyqtaı basqarma esebinen tólengen. Oblystyq meshittiń kiristeri men shyǵystary muqııat tekserilip, zań buzýshylyqtar men qarjy qarajattarynyń maqsatsyz paıdalanylýy anyqtalmaǵany aıtyldy.
Eske salaıyq, buǵan deıin Túrkistan oblysynyń bas ımamy Erjan Tólepovke qatysty daýǵa baılanysty áleýmettik jelilerde bas ımamnyń aýdan men qala meshitteriniń ımamdarynan májbúrli túrde aqsha jınaǵany týraly aqparat tarady. Jelide bas múftı Naýryzbaı qajy Taǵanulynyń Túrkistanǵa sapary úshin qarajat jınaý týraly málimetter men túbirtekter jarııalandy. Alaıda Tólepov bul aqparatty joqqa shyǵaryp, ımamdar gazet-jýrnaldarǵa jazylý úshin aqshany ózine aýdarǵanyn aıtty. Ol jaǵdaıǵa túsindirý jumystaryn júrgizgenin jáne avtordyń áreketine moraldyq jaýapkershilik júkteletinin málimdedi.
