جاڭالىقتار
«باسىنان تەپكەن»: قىزىلوردادا ءجاسوسپىرىم 6 جىلعا باس بوستاندىعىنان ايىرىلدى
فوتو: اشىق دەرەككوز
قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا كامەلەتتىك جاسقا تولماعان بالاعا اۋىر دەنە جاراقاتىن سالعان جاسوسپىرىمگە قاتىستى ۇكىم شىقتى, دەپ حابارلايدى Skifnews.kz اقپارات پورتالى.
قىزىلوردا وبلىستىق سوتىنىڭ Telegram-داعى رەسمي ارناسىندا جاريالانعان اقپاراتقا سۇيەنسەك, قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا قازاقستان رەسپۋبليكاسى قىلمىستىق كودەكسىنىڭ 106-بابىنىڭ 2-بولىگىنىڭ 7), 11)-تارماقتارى بويىنشا (بۇزاقىلىق نيەتپەن دەنساۋلىققا قاساقانا اۋىر زيان كەلتىرۋ) قىلمىستىق ءىس قارالعان.
سوتتالۋشى 2023 جىلعى 3 ساۋىردە كەشكىلىك ۋاقىتتا كوشە بويىندا كامەلەتكە تولماعان جابىرلەنۋشىنىڭ بالالارمەن الىسىپ جاتقانىن كورىپ, بۇزاقىلىق نيەتپەن كامەلەتكە تولماعان ادامعا قاتىستى دەنساۋلىققا قاساقانا اۋىر زيان كەلتىرۋ ماقساتىندا سوڭعىنىڭ باسىنان كۇشتەپ ءوزىنىڭ وڭ اياعىمەن 4-5 مارتە تەۋىپ, اۋىر دەنە جاراقاتىن سالعان, – دەلىنگەن سوت حابارلاماسىندا.
ءجاسوسپىرىم سوتتا بەرگەن جاۋابىندا تاعىلعان ايىپتى تولىق مويىنداپ, جاساعان ارەكەتىنە شىن نيەتپەن وكىنەتىنىن ايتىپ, جەڭىل جازا تاعايىنداۋدى سۇراعان.
سوت تالقىلاۋىندا كامەلەتكە تولماعان جابىرلەنۋشى مەن ونىڭ زاڭدى وكىلى سوتتالۋشىعا كەشىرىم بەرەتىنىن ايتىپ, باس بوستاندىعىنان ايىرۋدان باسقا جازا تاعايىنداۋدى سۇراعان.
سوتتالۋشى قىلمىستىق كودەكستىڭ 106-بابىنىڭ 2-بولىگىنىڭ 7), 11)-تارماقتارىمەن كىنالى دەپ تانىلىپ, 6 جىل مەرزىمگە باس بوستاندىعىنان ايىرۋعا ۇكىم ەتىلدى, قىلمىستىق كودەكستىڭ 63-بابىن قولدانىپ, سوتتالۋشىعا جازا شارتتى دەپ سانالىپ, وعان 1 جىل مەرزىمگە پروباتسيالىق باقىلاۋ بەلگىلەنىپ, بىرقاتار مىندەت جۇكتەلدى, – دەيدى سوت وكىلدەرى.
