«Basynan tepken»: Qyzylordada jasóspirim 6 jylǵa bas bostandyǵynan aıyryldy

Foto: ashyq derekkóz

Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda kámelettik jasqa tolmaǵan balaǵa aýyr dene jaraqatyn salǵan jasóspirimge qatysty úkim shyqty, dep habarlaıdy Skifnews.kz aqparat portaly.

Qyzylorda oblystyq sotynyń Telegram-daǵy resmı arnasynda jarııalanǵan aqparatqa súıensek, Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda Qazaqstan Respýblıkasy Qylmystyq kodeksiniń 106-babynyń 2-bóliginiń 7), 11)-tarmaqtary boıynsha (Buzaqylyq nıetpen densaýlyqqa qasaqana aýyr zııan keltirý) qylmystyq is qaralǵan.

Sottalýshy 2023 jylǵy 3 sáýirde keshkilik ýaqytta kóshe boıynda kámeletke tolmaǵan jábirlenýshiniń balalarmen alysyp jatqanyn kórip, buzaqylyq nıetpen kámeletke tolmaǵan adamǵa qatysty densaýlyqqa qasaqana aýyr zııan keltirý maqsatynda sońǵynyń basynan kúshtep óziniń oń aıaǵymen 4-5 márte teýip, aýyr dene jaraqatyn salǵan, – delingen sot habarlamasynda.

Jasóspirim sotta bergen jaýabynda taǵylǵan aıypty tolyq moıyndap, jasaǵan áreketine shyn nıetpen ókinetinin aıtyp, jeńil jaza taǵaıyndaýdy suraǵan.

Sot talqylaýynda kámeletke tolmaǵan jábirlenýshi men onyń zańdy ókili sottalýshyǵa keshirim beretinin aıtyp, bas bostandyǵynan aıyrýdan basqa jaza taǵaıyndaýdy suraǵan.

Sottalýshy Qylmystyq kodekstiń 106-babynyń 2-bóliginiń 7), 11)-tarmaqtarymen kináli dep tanylyp, 6 jyl merzimge bas bostandyǵynan aıyrýǵa úkim etildi, Qylmystyq kodekstiń 63-babyn qoldanyp, sottalýshyǵa jaza shartty dep sanalyp, oǵan 1 jyl merzimge probaııalyq baqylaý belgilenip, birqatar mindet júkteldi, – deıdi sot ókilderi.