«Batyl bol»: Derekti fılm qazaq tilin úırenip, kedergilerdi jeńýge bolatynyn kórsetedi

Foto: ashyq derekkóz

Qazirgi tańda Ulttyq kıno ortalyǵynyń qoldaýymen «Batyl bol» derekti fılminiń óndirisi júrip jatyr. Týyndy mańyzdy taqyrypty – qazaq tilin meńgerý máselesin kóteredi. «Batyl bol» fılmi – rejısser Tatıana Shıshkınanyń debıýttik jumysy jáne ol memlekettik tildi úırenýge umtylǵan adamdardyń tájirıbesimen tanystyrýdy maqsat etedi, dep jazdy qandastar.kz

Fılmniń tarıhy avtordyń júrip ótken jolymen tikeleı baılanysty. Ol qazaq tilin úırený maqsatynda Almatyda ashylǵan «Batyl bol» qazaq tilin úıretý klýbyna júgingen. 2022 jyly klýb ashylǵan kúni-aq oǵan 300-den astam adam ótinish qaldyrǵan. «Batyl bol» klýby olardyń barlyǵynyń tildik barerdi eńserýine aqysyz septesken. Budan soń klýbtyń ózge qalalarda da fılıaly ashylyp, Qazaqstanda tanymaldyǵy artqan. Úıirmeniń negizin qalaýshy – Alekseı Skalozýbov. Ol jastaıynan qazaq tilin meńgerip, kúndelikti ómirde qoldanýdy armandaǵan. Almatyǵa arman arqalap, úıirme ashyp, onyń isin ilgeriletken. Búginde úıirmege til úırenýge ynta tanytqan árbir adam qatysa alady. Onyń ishinde ártúrli etnıkalyq top ókilderi bar. Olar tek qazaq tilin ǵana emes, halqymyzdyń salt-dástúri men ádet-ǵurpyn jiti zerdeleýge nıetti. Fılmdi túsirýge qozǵaý salǵan da osy dúnıe.

Týyndy avtory tek bul faktilermen ǵana shektelmeı, elimizdegi til úırený máselesin tereń taldaýǵa tyrysqan. О́zge ult ókilderiniń memlekettik tildi ıgerýdegi ishki kedergileri men qorqynyshy qatar qozǵalǵan. Derekti fılmniń túsirilimi Almatydan bólek, Astana, Aqtaý, Oral jáne Atyraý qalalarynda da júrgizildi. Munda avtor qazaq tilin úırenýge jáne ózderiniń kompleksterin jeńýge talpynǵan adamdardyń pikiri men sezimin ózgeshe jınaqtaıdy.

Aıta keteıik, derekti fılm – ótken jyly pıtchıngten sýyrylyp shyqqan jobanyń biri.