جاڭالىقتار
باتىس قازاقستان وبلىسىندا اۋىل ىشىمەن ءجۇرىپ وتكەن رەسەيدىڭ اسكەري كولىگى گاز قۇبىرىن قاققان
فوتو: اشىق دەرەككوز
باتىس قازاقستان وبلىسىندا رەسەي شەكاراسىنان 5 شاقىرىم قاشىقتىقتا ورنالاسقان سايقىن اۋىلىندا كورشى ەلدىڭ اسكەري تەحنيكاسى اۋىل ىشىنە تارتىلعان گاز قۇبىرىن قاعىپ كەتكەن, دەپ حابارلادى Qandastar.kz kursiv.media سىلتەمە جاساپ.
بوكەي ورداسى اۋدانى اكىمدىگىنىڭ اقپاراتىنا سايكەس, رەسەي فەدەراتسياسى بوكەي ورداسى اۋماعىندا, سايقىن اۋىلىنان 100 شاقىرىم قاشىقتىقتا ورنالاسقان اسكەري پوليگوندى جالعا الىپ وتىر. ول جەردە رەسەيدىڭ ەكى اسكەري ءبولىمى بار. اسكەريلەر ۆاحتالىق رەجيممەن قىزمەت ەتەتىندىكتەن, ەكى ەل اراسىنداعى مامىلە شارتتارىنا سايكەس, اسكەري تەحنيكا ەلدىمەكەننەن تىس وتەتىن جولدار ارقىلى ۇنەمى پوليگونعا كىرىپ-شىعادى.
باسىلىم كەلتىرگەن مالىمەتكە سايكەس, بوكەي ورداسى اكىمشىلىگى اسكەري تەحنيكانىڭ اۋىل ىشىنەن ءوتۋ سەبەبىن ءتۇسىندىرىپتى. اقپاراتقا قاراعاندا, كۇن جاۋىن-شاشىندى بولعاندىقتان, اۋىل سىرتىنداعى قارا جولدارمەن ءجۇرۋ مۇمكىن بولماعان. سوندىقتان اسكەري تەحنيكا سايقىن اۋىلىنداعى اسفالتپەن ءجۇرىپ وتكەن.
«20 قازان كۇنى, اسكەري تەحنيكانىڭ 5 كولىگى اۋىل ىشىندەگى اسفالت جول ارقىلى ءوتتى. الايدا گاباريتتى الدىن-الا ەسەپتەمەگەن ءبىر كولىك گاز قۇبىرىن ءىلىپ كەتتى. قۇبىرعا كۇردەلى زاقىم كەلگەن جوق جانە گاز قۇبىردان سىرتقا تاراعان جوق», – دەپ حابارلادى اكىمشىلىك
قازىر ءمان-جاي انىقتالىپ جاتىر, ارنايى تەحنيكانىڭ جۇرگىزۋشىسى جاۋاپقا تارتىلۋى ىقتيمال. باسىلىمنىڭ جازۋىنشا, ەكى ەل اراسىنداعى مامىلەدە اسكەري تەحنيكاعا پوليتسيا اۆتوكولىگىنىڭ ىلەسىپ ءجۇرۋى قاراستىرىلماعان ەكەن.
ايتا كەتەيىك, سايقىن اۋىلى, باتىس قازاقستان وبلىسىنداعى, بوكەي ورداسىنا قاتىستى سايقىن اۋىلدىق وكرۋگىنىڭ ورتالىعى. 2021 جىلعى ساناققا سايكەس, اۋىلدا جالپى سانى 5 مىڭعا جۋىق حالىق تۇرادى. اۋىلدا بىرنەشە مەكتەپ جانە كىتاپحانا, ورتالىقتاندىرىلعان اۋرۋحانا, دارىگەرلىك امبۋلاتوريا جانە 4 فەلدشەرلىك-اكۋشەرلىك پۋنكت بار.
