باتىس قازاقستاندا 27 ءجاسوسپىرىم قىز جۇكتى بولىپ قالعان

باتىس قازاقستان وبلىسىندا كامەلەتكە تولماعان 27 قىز جۇكتى بولىپ قالعان. وبلىستىق دەنساۋلىق ساقتاۋ باسقارماسى ەرتە جۇكتى بولعانداردىڭ دەنى 17 جاستا ەكەنىن ايتتى, دەپ جازدى Qandastar.kz «موي گورود«-قا سىلتەمە جاساپ.

جاستايىنان انا اتانباقشى بولعان قىزداردىڭ تورتەۋى عانا اۋىلدىق جەردە تۇرادى ەكەن. قالعانى قالادا.

وتكەن جىلى وڭىردە 65 قىز بالانىڭ اياعى اۋىر بولعان. بىلتىر كامەلەتكە تولماعاندار 11 ءسابيدى دۇنيەگە اكەلگەن. بيىل توعىز قىز بوساندى. ال 2023 جىلى وسىنداي سەگىز جاعداي تىركەلگەن.

دارىگەرلەر قىز بالانىڭ ەرتە جۇكتى بولۋى ونىڭ دەنساۋلىعىنا زيان ەكەنىن ايتىپ, دابىل قاعىپ وتىر.

«جالپى ەرتە جۇكتىلىك دەپ 13-18 جاستا بولاتىن جۇكتىلىكتى ايتادى. جاسوسپىرىمدەردىڭ جۇكتىلىگى, كوبىنەسە 14 پەن 17 جاس ارالىعىندا كەزدەسەدى. ەرتە جۇكتىلىك ەكى ەسە قاۋىپ توندىرەدى: بۇل بولاشاق انانىڭ دەنساۋلىعىنا وراسان زيان كەلتىرەدى, بۇل بالانىڭ وزىنە دە قاۋىپتى», — دەيدى ۆەدومستۆو.

ەرتە جۇكتى بولعان قىزداردىڭ تورتەۋى تۇسىك تاستاپتى. ەتەگى ەرتە اشىلعان قىزدار كەيدە اتا-اناسىنان قورقىپ, اق حالاتتى جانداردىڭ قابىلداۋىندا بولماي, تۇسىك تاستاۋدىڭ ءتۇرلى جولىن ىزدەپ جاتادى, دەيدى دارىگەرلەر.