Batys Qazaqstanda kópirdi sý shaıdy

Foto:BQO turǵyndarynan

Syrym aýdany Araltóbe aýyly mańynda kópirdi sý shaıyp, aýdan ortalyǵymen qatynas úzildi, dep jazdy qandastar.kz

Syrym aýdany ákimdiginen túsken málimetke qaraǵanda, qardyń kúrt erýi saldarynan sý deńgeıi kóterilip, 16 naýryz kúni tańmen ýaqytsha kópirdiń aınalasyndaǵy topyraq shaıylyp ketti. Negizgi kópirge jóndeý jumystary júrgizilýde.

— Osyǵan baılanysty jol jabylyp, kólik jáne jaıaý júrginshilerdiń qozǵalysy toqtatyldy. Syrym aýdandyq tótenshe jaǵdaılar jáne aýdandyq ishki ister bólimi tarapynan kezekshilik uıymdastyryldy. Turǵyn úılerge qaýip joq. Qazirgi ýaqytta Aksaı qalasy jaǵynan balamaly kirý joldary bar. Qalpyna keltirý jumystaryn sý deńgeıi tómendegen soń bastaý josparlanýda, — dep habarlady Syrym aýdany ákimdiginen.

Araltóbe aýyldyq okrýginiń ákimi Ádilhan Muhıtovtyń naqtylaýynsha, Shiderti ózenindegi sý deńgeıi 15 naýryz kúni saǵat 16.00-den bastap kúrt kóterilip, búgin tańǵy 04.00-05.00-terde kópirdi eki jaǵynan jyryp ketken.

— Aýylda on kúnge jetetin azyq-túlik qory bar. Araltóbede 190 úıde 664 adam turady. Orta mektep, ambýlatorııa, mádenıet úıi sııaqty áleýmettik nysandar qalypty jumys istep tur. Aýdan ortalyǵy jaǵynan «KamAZ» kólikterimen qum-qıyrshyq tas qospasy tasylyp, kópirdi qaıta bekitýge qam jasalatyn bolady. Qıyndyq týyndaǵan jaǵdaıda Tasqudyq aýyly arqyly 90 shaqyrym qashyqtyqta ornalasqan Bórli aýdany ortalyǵy Aqsaı qalasyna qatynaýǵa bolady. Tasqudyqqa deıin 45 shaqyrym greıder jol, ar jaǵy – asfalt, — dedi Kazinform tilshisine Á.Muhıtov.

Sonymen qatar Qaratóbe aýdany Aqtaısaı aýylynyń turǵyndary aýdan ortalyǵymen baılanystyratyn joldyń ústimen sý ótkenin habarlady.

— 15 naýryz kúni saǵat 16.00-de Qarakól aýyldyq okrýgi Aqtaısaı aýylynyń irgesindegi Taıan ózeninen ótetin ótkeldiń ústinen qar sýy ótti. Eni — 20 metr. Eldi mekenge qaýip joq, — dedi bul oqıǵaǵa baılanysty Qaratóbe aýdanynyń ákimi Qadyrjan Súıeýǵalıev.