«باۋىرىم»: ەلدوس سمەتوۆ پەن حابيب نۋرماگومەدوۆ قاجىلىقتا كەزدەستى

ۇلكەن قاجىلىققا بارعان دزيۋدودان وليمپيادا چەمپيونى UFC-ءنىڭ بۇرىنعى چەمپيونى حابيب نۋرماگومەدوۆپەن كەزدەسىپ قالىپ, ءبىراز اڭگىمەلەستى, دەپ حابارلايدى Qandastar.kz اقپارات پورتالى.

اڭگىمە بارىسىندا ەلدوستىڭ ءحابيبتىڭ اكەسى ابدۋلماناپ نۋرماگومەدوۆپەن بۇرىننان تانىس بولعانى بەلگىلى بولدى.
«ءسىزدىڭ اكەڭىز ابدۋلماناپ اعا قازاقستان قۇراماسىنىڭ وقۋ-جاتتىعۋ جيىندارىنا ءجيى كەلىپ تۇراتىن. ول كىسى الماتىعا كەلگەندە تانىسىپ, سۋرەتكە تۇستىك. اعامىز دزيۋدوعا ەرەكشە جانكۇيەر بولعان ەدى», — دەدى سمەتوۆ.

ءوز كەزەگىندە حابيب تە ەلدوسپەن تانىسقانىنا قۋانىشتى ەكەنىن ءبىلدىرىپ, ساتتىلىك تىلەدى.

«كورگەنىمە قۋانىشتىمىن, باۋىرىم. ساتتىلىك!» — دەدى نۋرماگومەدوۆ.

ايتا كەتەيىك, ابدۋلماناپ نۋرماگومەدوۆتىڭ «اكە» اتتى اۆتوبيوگرافياسىندا دزيۋدو تۋرالى بىلاي دەپ جازىلعان:

«مەن كەزىندە ءحابيبتىڭ دزيۋدودا قالعانىن قالادىم. بۇل — وليمپيادالىق سپورت ءتۇرى, ءوزىم دە ەل چەمپيونى اتانعانمىن.
دزيۋدو — جەكپە-جەك تۇرلەرىنىڭ ىشىندەگى بەدەلدى باعىت. مۇندا قارسىلاستار ەشقاشان قايتالانبايدى, ۇنەمى اۋىسىپ وتىرادى. جالپى العاندا, بۇل – ءاردايىم وسۋگە مۇمكىندىك بار كۇردەلى سپورت ءتۇرى.

قىسقاسى, مەن ءحابيبتىڭ دزيۋدوشى بولعانىن قالادىم. بىراق ۇلىم ارالاس جەكپە-جەكتى تاڭدادى».