Baýyrjan Báıbek krıptomıllıoner atanýy múmkin

Foto: Vladımır Tretıakov

Baýyrjan Báıbek Lıýksembýrgtaǵy yqpaldy azamattardy ara aǵaıyn retinde paıdalanyp, Qazaqstanǵa qaýipsiz oralý máselesin talqylaýdy oılastyra bastady. DALA INSIDE derekkózi, «Jańa Qazaqstan» tarapynan Báıbekke garantııa beretin tulǵanyń áli anyqtalmaı otyrǵanyn tilge tıek etedi, dep jazady qandastar.kz

Bir kezderi Almaty qalasynyń ákimi, «Nur Otan» partııasy basshylarynyń biri bolǵan Baýyrjan Báıbek sońǵy jyldary Kıprde turaqtaǵan. Biraq Eýropaǵa jıi saparlap júr.

Báıbektiń Kıprge ketkeni týraly aqparat qoǵamda eki túrli qabyldandy. Bireýler ony saıası sebeptermen ketýge májbúr boldy dese, basqalary Báıbek túrli qarjylyq mahınaııalar boıynsha aıyptaýlardan qashty dep sanaıdy.

«Baýyrjan Báıbek shetelde krıptavalıýtamen aınalysyp kórdi. Shyn aıtqanda bul tirligi birshama tabysty bolyp shyqty. Qazir ol kánigi krıptoınvestor», – deıdi, DALA INSIDE derekkózi.

Báıbektiń bolashaqta oralýyna áser etken negizgi sebepter retinde sońǵy saıası ózgeristerdi aıtýǵa bolady. Jańa bılik qurylymy, aktıvterdi qaıtarǵandarǵa jyly kózqaras onyń elge qaıta oralyp, qoǵamdyq nemese saıası ómirge qaıta aralasýyna jaǵdaı jasaı alatyn sekildi.

Báıbektiń elge oralýy qoǵamdy ekige jara alady. Bireýler ony burynǵy isteri úshin jaýap berýi kerek dep sanasa, endi bireýler onyń jańa kózqaraspen, tájirıbemen oralyp, elge paıda tıgize alatynyn alǵa tartýy múmkin.

Báıbektiń oralýy Qazaqstandaǵy saıası sahnada jańa betburys ákelmek. Ázirshe bul tek ınsaıderlik aqparat retinde qarastyrylyp otyr. Anyǵyn Lıýksembýrgtaǵy avtorıtet sheshedi.