بەكەتاەۆ ءىسى: انتيكور شەتەلگە قاشىپ كەتپەك بولعان كەزىندە ۇستالعان ەكس-شەنەۋنىككە قاتىستى پىكىر ءبىلدىردى

سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بەكايداروۆ بۇرىنعى ادىلەت ءمينيسترى مارات بەكەتاەۆقا قاتىستى پىكىر ءبىلدىردءى, دەپ حابارلايدى qandastar.kz Dalanews.kz-كە سىلتەمە جاساپ.

ونىڭ ايتۋىنشا, قىلمىستىق ءىستى تەرگەپ-تەكسەرۋ اياقتالعان.

“قازىر تاراپتاردىڭ ماتەريالدارىمەن تانىسىپ جاتىرمىز. ءىس وسى پروتسەسس اياقتالعان سوڭ سوتقا جولدانادى”, — دەدى ول.

ەسكە سالايىق, بۇعان دەيىن جوعارى اۋديتورلىق پالاتاسانىڭ توراعاسى ءاليحان سمايىلوۆ بۇرىنعى ادىلەت ءمينيسترى مارات بەكەتاەۆتىڭ ىسىنە قاتىستى مالىمدەمە جاساعان ەدى.

ونىڭ سوزىنشە, جوعارى اۋديتورلىق پالاتاسى 2023 جىلى ادىلەت مينيسترلىگىندە تەكسەرىس جۇرگىزگەن.

«2023 جىلعى مەملەكەتتىك اۋديت وبەكتىلەرىنىڭ تىزبەسىنە سايكەس, جوعارى اۋديتورلىق پالاتاسى ادىلەت مينيسترلىگى مەن ونىڭ قۇرامىنداعى ۇيىمداردىڭ رەسپۋبليكالىق قارجىنى كەيبىر بيۋدجەتتىك باعدارلامالار بويىنشا قالاي قولدانعانىن تەكسەرۋ ءۇشىن اۋديتورلىق شارالار وتكىزىلدى. ءبىز شىعارعان شەشىم انتيكورعا بەرىلىپ, وسى ىسكە قاتىستى كەيبىر تۇلعالار ۇستالدى. ازىرگە باسقا نارسە ايتا المايمىن, سەبەبى قازىرگى تاڭدا ءىس انتيكوردىڭ باقىلاۋىندا», — دەيدى ءاليحان سمايىلوۆ. 

پالاتا توراعاسى بەكەتاەۆتىڭ ناقتى نە ءۇشىن ۇستالعانىنان بەيحابار ەكەنىن, بىراق جوعارى اۋديتورلىق پالاتاسى تەكسەرىس جۇرگىزىپ, قورىتىندىسى انتيكورعا بەرىلگەنى فاكت ەكەنىن اتاپ ءوتتى.

بۇعان دەيىن جوعارى اۋديتورلىق پالاتاسى ادىلەت مينيسترلىگىندە جانە «بولاشاق» كونسالتينگتىك كومپانياسىنا قارسى تەكسەرۋ جۇرگىزگەنىن حابارلاعان بولاتىنبىز. تەكسەرۋ قورىتىندىسى ازىرگە قۇپيا جانە قىلمىستىق ءىس اياسىندا ماتەريالدار تاركىلەندى.

شىلدە ايىندا انتيكور مارات بەكەتاەۆقا قاتىستى تەرگەۋ اياقتالعانىن حابارلادى. ول جەكە كومپانيانىڭ باسشىلىعىمەن بىرگە بيۋدجەت قاراجاتىن اسا ءىرى مولشەردە جىمقىرىپ, الاياقتىق جاسادى جانە كاسىپكەرلىك قىزمەتكە زاڭسىز قاتىستى دەگەن كۇدىككە ءىلىندى.

انتيكور بۇرىنعى ادىلەت ءمينيسترىن 2023 جىلدىڭ 21 قازانىندا ەلدەن قاشىپ كەتپەك بولعان كەزىندە ۇستاعان ەدى. 

بەكەتاەۆ 2016-2022 جىلدارى ادىلەت ءمينيسترى بولعان. ول قاندى قاڭتار وقيعاسىنان سوڭ قىزمەتىنەن بوساتىلىپ, كەيىن پرەمەر-ءمينيستردىڭ كەڭەسشىسى قىزمەتىنە تاعايىندالعان ەدى. بىراق ول كەڭەسشى قىزمەتىنەن ءبىر جىلدان كەيىن كەتكەن.

سونىمەن قاتار, DALA INSIDE بايبەككە قاتىستى ەكس ادىلەت ءمينيسترى مارات بەكەتاەۆتا تەرگەۋشىلەرگە ءبىراز قۇندى اقپارات بەرگەنىن جازعان بولاتىن. قىلمىستىق ءىس قوزعاۋعا تۇرارلىق ءبىرشاما ماتەريال جينالىپ قالدى.

«قازىر باۋىرجان بايبەككە قىلمىستىق ءىس قوزعاماق بۇرىن, ونى ەكستراديتسيالاۋ مۇمكىن بە, سول جاعى شەشىلۋدە. سەبەبى «جاڭا قازاقستان» ءۇشىن ادامدى سىرتىنان سوتتاۋ جارامايدى», دەيدى DALA INSIDE دەرەككوزى.

بايبەكتىڭ الماتىداعى بارلىق شەشىمدەرىنە رەۆيزيا جاسالاتىن بولادى. وعان رەۆيزيالىق كوميسسيا مۇشەلەرى مەن اۋديتورلار جۇمىلدىرىلادى دەپ جوسپارلانعان.

سوڭعى رەت باۋىرجان بايبەك كيپر مەن گەرمانيادا بوي كورسەتكەن ەدى. نەگىزى ول وتكەن جەلتوقسان ايىندا سولتۇستىك كيپر اۋماعىندا جۇرگەن دەيدى, دەرەككوز. سولتۇستىك كيپر بۇۇ تاراپىنان مويىندالماعان كۆازيمەملەكەت. بىراق تۇركيا ارقىلى ەكستراديتسيا ماسەلەسىن شەشۋگە بولادى.

ال تاعى ءبىر دەرەككوز باۋىرجان بايبەكتىڭ افريكاعا كوشەيىن دەپ جاتقانىن مالىمدەدى. تانزانيادا كوبالت وندىرىسىنە ينۆەستيتسيا سالعان قازاق كاسىپكەرلەرىن جاعالايدى دەگەن اقپارات بار. بيزنەسمەندەر وعان ءسال دە بولسا قولداۋ ءبىلدىرىپ جىبەرۋگە كەت ءارى ەمەس.