جاڭالىقتار
بەكتەنوۆ اقمولاعا جۇمىس ساپارىمەن بەردى
اقمولا وبلىسىنىڭ اكىمى مارات احمەتجانوۆ پرەمەر-ءمينيستردى ءوڭىردىڭ الەۋمەتتىك-ەكونوميكالىق دامۋى تۋرالى حاباردار ەتتى, دەلىنگەن ۇكىمەت ءباسپاسوز قىزمەتىنىڭ حابارلاماسىندا.
قازىرگى ۋاقىتتا قالادا رەسمي تۇردە 59 مىڭعا جۋىق ادام تۇرادى, بۇل رەتتە باعالاۋ دەرەكتەرى بويىنشا تۇرعىنداردىڭ ناقتى سانى 100 مىڭنان استام ادامدى قۇرايدى. 30 مىڭ تۇرعىنعا ەسەپتەلگەن ينجەنەرلىك جەلىلەرگە ايتارلىقتاي ۇلكەن جۇكتەمە تۇسۋدە. بولجام بويىنشا, حالىق سانى 2038 جىلعا قاراي 150 مىڭعا دەيىن وسەدى.
جاڭا باس جوسپار اۋماقتى كەڭەيتۋدى, جاڭارتىلعان قىزمەت كورسەتۋ ايماقتارىنا ءبولۋدى, سونداي-اق ينجەنەرلىك جانە كولىك ينفراقۇرىلىمىن جاڭعىرتۋدى كوزدەيدى. قوسشى اكىمى ازامات قاپىشەۆ ۇكىمەت باسشىسىنا قالانىڭ تۇرعىن ءۇي قورىن كەڭەيتۋ, جاڭا الەۋمەتتىك جانە ينفراقۇرىلىمدىق نىساندار اشۋ, ساۋىقتىرۋ ايماقتارىن دامىتۋ جانە تاعى باسقا دا جوسپارلانعان شارالار تۋرالى باياندادى.
جاڭا كوپپاتەرلى تۇرعىن ۇيلەردىڭ قۇرىلىسىنا 360 گەكتاردان استام, جەكە تۇرعىن ءۇي قۇرىلىسىنا 900 گەكتاردان استام جەر تەلىمى بولىنگەن. سونداي-اق 2038 جىلعا دەيىن 31 بالاباقشا, 16 جالپى ورتا مەكتەپ, وبلىستىق اۋرۋحانا جانە 7 ەمحانا سالۋ جوسپارلانىپ وتىر.
كوممۋنالدىق ينفراقۇرىلىمدى دامىتۋ جانە قوسىمشا قۋاتتاردى قۇرۋ ماقساتىندا جاڭا قازاندىق, قوسالقى ەلەكتر ستانساسى مەن ەبج, سۋمەن جابدىقتاۋ, تازارتۋ قۇرىلىستارى جانە باسقا دا نىساندار سالۋ كوزدەلگەن. 2024 جىلى «سارى-ارقا» ماگيسترالدى گاز قۇبىرى ارقىلى قالانى كوگىلدىر وتىنمەن قامتۋ جۇمىستارى باستالىپ, 2026 جىلى اياقتالادى. بۇدان باسقا, وندىرىستىك جانە كوممۋنالدىق كاسىپورىندارعا ارنالعان الاڭدار سالىنادى. ونەركاسىپتى دامىتۋ جانە قالانىڭ سولتۇستىك-باتىس بولىگىندە جاڭا جۇمىس ورىندارىن قۇرۋ ءۇشىن جالپى اۋدانى 264 گا يندۋستريالىق ايماق اشۋ كوزدەلگەن. ەلورداعا اپاراتىن جول سالۋ جوسپارلانۋدا.
سونىمەن قاتار ساياباقتار مەن جاياۋ جۇرگىنشىلەرگە ارنالعان گۇلزارلاردى اباتتاندىرۋ, ويىن جانە سپورت نىساندارى بار بالالاردىڭ ويىن-ساۋىق جانە دەمالىس ساياباعىن اشۋ جوسپارلانعان. جاسىل جەلەكتەر وتىرعىزۋعا بولىنگەن جالپى اۋماق 132,5 گەكتاردى قۇرايدى. اكىمشىلىك عيماراتتار, ورتالىق ستاديون, مۇز سارايى, دەنە شىنىقتىرۋ-ساۋىقتىرۋ كەشەندەرى, مادەنيەت ۇيلەرى, جاڭا نەكە سارايى, وقۋشىلار سارايى, تەاتر, بالالار مەن جاسوسپىرىمدەر سپورت مەكتەبىن سالۋ ءۇشىن اۋماقتار قاراستىرىلعان.
كۇردەلى ماسەلەلەردى شەشۋگە ەرەكشە كوڭىل ءبولىندى.
اتاپ ايتقاندا, پرەمەر-مينيستر جاڭا ءورت ءسوندىرۋ دەپوسى قۇرىلىسىنىڭ بارىسىمەن تانىستى. 4 جىلدان كەيىن جۇمىستىڭ تەك 60%-ى اياقتالعان. الايدا, مەردىگەر ۇيىم قارجىلاندىرۋدىڭ جەتكىلىكسىز ەكەنى تۋرالى حابارلاعان. شارت بويىنشا زاماناۋي قوندىرعىلارمەن جابدىقتالعان نىسان قۇرىلىسىنا 1,2 ملرد تەڭگەگە جۋىق قاراجات ءبولىندى. ولجاس بەكتەنوۆ قوسىمشا قارجى قاراستىرىلمايتىنىن, قاراجات تەك جسق-عا ەنگىزىلگەن سوما شەگىندە بولىنەتىنىن باسا ايتتى. پرەمەر-مينيستر مەردىگەرلىك ۇيىمنان جاقىن ارادا جۇمىستاردى اياقتاۋدى تالاپ ەتتى, ورىندالماعان جاعدايدا شارت بۇزىلادى.
سونداي-اق 537 ۇلەسكەردىڭ, ونىڭ ىشىندە «سيرەن باعى» تۇرعىن ءۇي كەشەنىنىڭ كوپجىلدىق ماسەلەسىن شەشۋ تۋرالى باياندالدى. جاڭا مەردىگەر قالا كۇنىنە وراي 106 تۇرعىنعا باسپانا كىلتى تابىستالادى دەپ ۋادە بەرىپ وتىر, تاعى 209 وتباسى جاقىن ارادا كوپتەن كۇتكەن جاڭا ۇيلەرىنە قونىستانادى. ءوز كەزەگىندە, ونەركاسىپ جانە قۇرىلىس ءمينيسترى قانات شارلاپاەۆ ءتيىستى زاڭنامانى جەتىلدىرۋ بويىنشا جۇرگىزىلىپ جاتقان جۇمىستار تۋرالى حابارلادى.
جۇمىس ساپارى بارىسىندا قوسشىداعى كوپسالالى اۋرۋحانا قۇرىلىسىنا بارعان ولجاس بەكتەنوۆ وڭىردە تۇرعىندارعا كورسەتىلەتىن مەديتسينالىق قىزمەت ساپاسىن ارتتىرۋ باعىتىندا اتقارىلىپ جاتقان جۇمىستاردى تەكسەردى.
350 ورىندىق ستاتسيونارى جانە ءبىر اۋىسىمدا 1 مىڭ كەلۋشىگە دەيىن قابىلداي الاتىن ەمحاناسى بار مەديتسينالىق مەكەمە قالا جانە اقمولا وبلىسىنىڭ استانا ماڭىنداعى جەتى اۋدانى تۇرعىندارىنا قىزمەت كورسەتەدى. بۇگىنگى تاڭدا قوسشى تۇرعىندارىنا مەملەكەتتىك جانە جەكە ەمحانالاردا اۋىسىمىنا 250 كەلۋشىگە دەيىن مەديتسينالىق كومەك كورسەتىلەدى. سونىمەن قاتار سوڭعى 2 جىلدا تىركەلگەن حالىق سانى 24 مىڭنان 42 مىڭ ادامعا دەيىن ءوستى. كوپسالالى اۋرۋحانانىڭ قۇرىلىسى ورىن تاپشىلىعى ماسەلەسىن شەشەدى. مۇندا حيرۋرگيا, تراۆماتولوگيا, كارديوحيرۋرگيا, نەيروحيرۋرگيا, ونكولوگيا, حيميوتەراپيا جانە باسقا دا بولىمشەلەر جۇمىس ىستەيدى. بۇدان باسقا, اۋماقتا مەديتسينا قىزمەتكەرلەرىنە ارنالعان ەكى كوپپاتەرلى تۇرعىن ءۇي جانە قالا سىرتىنان كەلەتىن ناۋقاستاردى ورنالاستىرۋ ءۇشىن پانسيونات قۇرىلىسى قاراستىرىلعان.
نىسان جەكە ينۆەستيتسيا ەسەبىنەن 28 ملرد تەڭگەدەن استام سوماعا سالىنۋدا. ونىڭ 9 ملرد تەڭگەدەن استامى اۋرۋحانانى Siemens نەمىس كومپانياسىنىڭ زاماناۋي مەديتسينالىق جابدىقتارىمەن قامتاماسىز ەتۋگە جۇمسالادى دەپ جوسپارلانىپ وتىر. جۇمىسقا بارلىعى 200-گە جۋىق ادام جۇمىلدىرىلعان, قۇرىلىس ماتەريالدارى نەگىزىنەن وتاندىق وندىرۋشىلەردەن ساتىپ الىنادى. ەمحانا وسى جىلدىڭ سوڭىنا دەيىن, ستاتسيونار 2026 جىلى اشىلادى دەپ جوسپارلانعان. مەديتسينالىق جاڭا مەكەمەنىڭ ىسكە قوسىلۋى 956 جۇمىس ورنىن اشۋعا مۇمكىندىك بەرەدى.
ەستەرىڭىزگە سالا كەتەيىك, مەملەكەت باسشىسى ۇكىمەتتىڭ كەڭەيتىلگەن وتىرىسىندا ازاماتتاردىڭ تۇرمىس ساپاسىنا اسەر ەتەتىن بارلىق ماسەلەلەرگە نازار اۋدارۋدى تاپسىردى. ۇكىمەت الەۋمەتتىك جانە ينجەنەرلىك ينفراقۇرىلىمدى جاڭعىرتۋ بويىنشا جۇيەلى جۇمىس جۇرگىزۋدە.
