جاڭالىقتار
بەكتەنوۆ ەكونوميكانىڭ ءوسىپ جاتقان سالالارىن اتادى
پرەمەر-مينيستر ولجاس بەكتەنوۆ 8 پروتسەنتتىك ءوسۋ قارقىنى بار ەكونوميكا سالالارىن اتادى,-دەپ حابارلايدى Qandastar.kz
پارلامەنت پالاتالارىنىڭ بىرلەسكەن وتىرىسىندا دەپۋتاتتار ۇكىمەت باسشىسىنان ەل ەكونوميكاسىنىڭ ءوسۋى جايىندا سۇرادى. بەكتەنوۆتىڭ ايتۋىنشا, وتاندىق ەكونوميكانىڭ دامۋ قارقىنىنا كۇردەلى گەوساياسي جاعداي كەرى اسەر ەتۋى مۇمكىن. قازاقستانمەن ساۋدا جاسايتىن نەگىزگى ەلدەردىڭ ىشكى جاعدايى دا ءوز ىقپالىن تيگىزەدى.
“بىراق قازىرگى كەزدە ەكونوميكانىڭ كەيبىر سالالارىندا ءوسۋ قارقىنى جامان ەمەس. مىسالى, قۇرىلىس, كولىك پەن بايلانىس سالالارىندا 8 پروتسەنتكە جۋىق ءوسىم بار.
ساۋدا سالاسىندا ءوسۋ كورسەتكىشتەرى ازىرشە تومەن بولىپ وتىر. وعان سۋ تاسىقىنىنىڭ سالدارى اسەر ەتتى دەپ ويلايمىز. بىراق ول كورسەتكىشتەر بىرتە-بىرتە قالپىنا كەلىپ جاتىر”,-دەدى بەكتەنوۆ.
وسى ورايدا “وتە جوعارى ءوسۋ الەۋەتىنە يە سالالاردى” دا اتادى. ولار: قۇرىلىس, ينفراقۇرىلىم, وڭدەۋ ءوندىرىسى جارە اگروونەركاسىپ كەشەنى. سول سەبەپتى بۇگىندە وسى سالالارعا اۋقىمدى مەملەكەتتىك قولداۋ كورسەتىلىپ جاتىر.
“ماسەلەن, تەك “بايتەرەك” حولدينگى ارقىلى ەكونوميكامىزعا 3 تريلليون تەڭگەگە جۋىق ينۆەستيتسيا قۇيىلىپ جاتىر.
ال “سامۇرىق-قازىنا” قورى ەسەبىنەن 700 ميلليارد تەڭگە ءبولىندى”,-دەپ اتاپ كورسەتتى بەكتەنوۆ.
ايتا كەتەرى, قازاقستان پرەزيدەنتى قاسىم-جومار توقاەۆ جاڭا ۇكىمەت باسشىسىنا ەكونوميكالىق ءوسىم بويىنشا ناقتى تاپسىرما بەرگەن.
ەلدىڭ ىشكى جالپى ءونىمىن جىل سايىن كەم دەگەندە 6 پروتسەنتكە ءوسىرۋ كەرەك. وسىلايشا, 2029 جىلعا دەيىن ەكونوميكانىڭ كولەمى 450 ملرد دوللارعا جەتۋى شارت.
