BEKTENOV: SÝ TASQYNYNAN ZARDAP ShEKKENDERGE QAJETTI KО́MEK KО́RSETILEDI

Qazaqstan Premer-Mınıstri Oljas Bektenov Memleket basshysy Qasym-Jomart Toqaevtyń tapsyrmalarynyń oryndalý barysymen tanysý úshin Soltústik Qazaqstan oblysyna jumys saparymen bardy.

Úkimet basshysy baǵdarlama sheńberinde kommýnaldyq-energetıkalyq sektor jáne jol ınfraqurylymy nysandarynyń, sondaı-aq birqatar jeńil jáne óńdeý ónerkásibiniń, atap aıtqanda, aýyl sharýashylyǵy mashına jasaý kásiporyndarynyń jumysymen tanysatyn bolady.  Jumys sapary barysynda óńirdegi sý qoımalarynyń jaı-kúıi men sý tasqynyna qarsy is-sharalardy sapaly ári ýaqtyly júrgizý jumysyna erekshe nazar aýdaryldy. Soltústik Qazaqstan oblysy sý tasqyny qaýpi bar aımaqqa kiredi. Oblystyń negizgi sý kózi – Esil ózeni úsh sý qoımasy: Astana, Sergeev jáne Petropavl sý toraptarymen retteledi.  Úkimet basshysy Petropavl sý torabyna baryp, sý qoımasynyń aǵymdaǵy jaǵdaıyn tekserdi. Qazirgi ýaqytta ol qalypty jaǵdaıda jáne shtattyq rejımde jumys istep tur. Sý tasqyny kezeńinde sý qoımasy algorıtmge sáıkes jumystyń «tranzıttik rejımine» aýystyrylady jáne tasqyn sýlardyń ótýine áser etpeıdi. Sonymen qatar Oljas Bektenov ótken jyldyń sáýir aıynda shamadan tys tolyp ketken Sergeev sý qoımasynyń jaǵdaıyna nazar aýdardy. Sý qoımalary bar Sergeev jáne Petropavl sý toraptary — respýblıkalyq menshiktegi sý sharýashylyǵy qurylystarynyń tizbesine engizilgen jáne erekshe strategııalyq mańyzy bar sý sharýashylyǵy qurylystary. Sergeev sý qoımasyndaǵy jınalǵan sýdyń kólemi 82%-dy quraıdy. Bul jerlerde saıajaı ýchaskelerin erekshe nazarda ustaýdy tapsyramyn, — dep atap ótti Premer-Mınıstr. «Qazsýshar» RMK SQOF dırektory Shuǵaıyp Ibatýllınniń aıtýynsha, osy kezeńde Sergeev jáne Petropavl sý toraptary shtattyq rejımde jumys istep tur.

Alaıda, avtojoldaǵy kópirlerdiń jekelegen konstrýkııalary apatty jaǵdaıda. Osyǵan baılanysty ózge balamaly joldar arqyly kólik aǵynyn qaıta baǵyttaý máseleleri qarastyrylýda. Jalpy, óńirde sý tasqynyna beıim 87 eldi meken esepke alyndy. 24 qańtardan bastap oblys kúsheıtilgen daıyndyq rejımine aýystyryldy, 26 naýryzdan bastap Jedel shtab jumyldyryldy. Premer-Mınıstr Soltústik Qazaqstan oblysynyń ákimdigine josparlanǵan barlyq aldyn alý is-sharalaryn aıaqtaýdy, al TJM-ǵa sý tasqyny jaǵdaıy ýshyqqan jaǵdaıda kúshter men tehnıkany jumyldyrýdy tapsyrdy. О́zderińiz kórip otyrǵandaı, elimizdiń birqatar óńirlerinde sý deńgeıi kóterilip, sý tasqyny oryn aldy. Barlyq kúshter jumyldyryldy. Respýblıkalyq jáne óńirlik jedel shtabtar táýlik boıy jumys isteýde. Qazirgi tańda Tótenshe jaǵdaılar, Ishki ister, Qorǵanys mınıstrlikteri men Ulttyq qaýipsizdik komıtetiniń arnaýly kúshteri men quraldary — barlyǵy 4 myńǵa jýyq adam, 1,3 myńnan astam tehnıka sý tasqynyna qarsy jumystarǵa tartyldy. Jol qatynasy qıyn jerlerde adamdar tikushaqtarmen evakýaııalanýda. Jumystar qaýip tolyq seıilgenshe jalǵasatyn bolady. Jaǵdaı qatań baqylaýda. Zardap shekkenderge Úkimet jáne ákimdik tarapynan qajetti kómek kórsetiledi, — dep atap ótti Oljas Bektenov. SQO-ǵa jumys sapary aldynda Úkimet basshysy Oljas Bektenov óńirlerdiń ákimderi men tótenshe jaǵdaılar mınıstri Shyńǵys Árinovtiń sý tasqyny jaǵdaıyn baqylaý boıynsha júrgizilip jatqan jumystar týraly esepterin tyńdady.