جاڭالىقتار
بەكتەنوۆ سۋارمالى جەرلەردىڭ كولەمىن ۇلعايتۋدى جۇكتەدى
فوتو: اشىق دەرەككوز
پرەزيدەنت جولداۋىن ورىنداۋ اياسىندا ولجاس بەكتەنوۆ سۋ ۇنەمدەۋ تەحنولوگيالارىن ەنگىزۋ ەسەبىنەن سۋارمالى جەرلەردىڭ كولەمىن ۇلعايتۋدى تاپسىردى, دەپ حابارلايدى qandastar.kz
پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ۆەگەتاتسيالىق كەزەڭدى وتكىزۋ قورىتىندىلارى قارالدى.
پرەمەر-مينيستر بيىلعى ۆەگەتاتسيالىق كەزەڭ سۋ رەسۋرستارىنىڭ تاپشىلىعىنسىز وتكەنىن اتاپ ءوتتى. سونىمەن قاتار سۋدى ۇنەمدەيتىن تەحنولوگيالاردى قولدانۋدىڭ ماڭىزىنا توقتالدى. اسىرەسە, بۇل ماسەلە قازاقستاننىڭ وڭتۇستىك وڭىرلەرى ءۇشىن ەرەكشە مانگە يە.
«مەملەكەت باسشىسى حالىققا جولداۋىندا ەكونوميكانىڭ بارلىق سالالارىندا, اسىرەسە اۋىل شارۋاشىلىعىندا سۋ ۇنەمدەۋ تەحنولوگيالارىن پايدالانۋدىڭ ماڭىزىن اتاپ كورسەتتى. ءبىزدىڭ ەلىمىزدە ۇلكەن سۋ رەسۋرستارى جوق. سۋدى ۇنەمدى جۇمساۋ, بۇل ماسەلەدە حالىقتى عانا ەمەس, ەڭ الدىمەن بيزنەستى ىنتالاندىرۋ وتە ماڭىزدى. سوندىقتان وڭىرلەر سۋ ۇنەمدەۋ تەحنولوگيالارى بار ەگىس القاپتارىن ۇلعايتۋ جونىندەگى ينديكاتورلارعا قول جەتكىزۋگە ءتيىس», — دەپ اتاپ ءوتتى ولجاس بەكتەنوۆ.
سۋ ۇنەمدەۋ تەحنولوگيالارىن قولدانۋ جوسپارى اسىرا ورىندالعان قىزىلوردا وبلىسىنداعى وڭ ناتيجەلەر ايتىلدى. ءوڭىر ءداستۇرلى تۇردە سۋدى ەڭ كوپ تۇتىناتىن ايماق سانالادى. بيىل وبلىس سۋارۋ تيىمدىلىگىن ارتتىرا الدى, بۇل سۋدىڭ ەداۋىر كولەمىن ۇنەمدەۋگە مۇمكىندىك بەردى.
ولجاس بەكتەنوۆ بۇل تاجىريبەنى ەلىمىزدىڭ باسقا وڭىرلەرىندە قولدانۋدى تاپسىردى. سونداي-اق ۆەگەتاتسيالىق كەزەڭدە سۋ ءبولۋ بويىنشا كەلىسسوزدەردى ساپالى جۇرگىزۋ ءۇشىن كورشى مەملەكەتتەرمەن ىنتىماقتاستىقتى كۇشەيتۋ قاجەت.
