ءبىلىم
بەكتەنوۆ: سىنىپ جەتەكشىلەرىنىڭ جالاقىسى 30 پايىزعا ارتادى
فوتو: ينفورم.كز
سىنىپ جەتەكشىلەرى ءتيىستى ءوسىم الا الادى. بۇل تۋرالى پرەمەر-مينيستر ولجاس بەكتەنوۆ دەپۋتاتتىق ساۋالعا بەرگەن جاۋابىندا مالىمدەدى, – دەپ جازادى qandastar.kz
بۇل قادام «بالالار اراسىنداعى بۇزاقىلىق پەن قىلمىستىڭ الدىن الۋدا ماڭىزدى ءرول اتقاراتىن» 220 مىڭ مۇعالىمدى قولداۋعا باعىتتالعان.
«بيۋدجەتتىك مۇمكىندىكتەردى ەسكەرە وتىرىپ, سىنىپ جەتەكشىلەرىنىڭ مارتەبەسىن جاقسارتۋ ءۇشىن قوسىمشا تولەمدى كەزەڭ-كەزەڭىمەن 30%-عا ارتتىرۋ ماسەلەسى تالقىلانۋدا», – دەلىنگەن جاۋاپتا.
بەكتەنوۆ بۋللينگتىڭ الدىن الۋدىڭ جاڭا تاسىلدەرى تۋرالى دا باياندادى. ول 111 بايلانىس ورتالىعى جۇمىس ىستەيتىنىن, ءبىر جىلدا 18 783 ايەل مەن بالاعا كومەك كورسەتىلگەنىن العا تارتتى.
«5-9-سىنىپتارعا ارنالعان «جاھاندىق قۇزىرەتتەر» كۋرسىندا ەتيكا جانە ەستەتيكا ءبولىمى بار, ول بالالاردىڭ ەموتسيونالدىق ينتەللەكتىسى مەن سىني ويلاۋىن دامىتادى, سونىمەن قاتار 20 ايماقتا پسيحولوگيالىق قولداۋ ورتالىقتارى اشىلدى», – دەپ قوستى پرەمەر-مينيستر.
ەسكە سالايىق, بالالار مەن ولاردىڭ اتا-انالارىنا جەدەل پسيحولوگيالىق جانە قۇقىقتىق كومەك كورسەتۋ ءۇشىن بايلانىس ورتالىقتارى, BalaQorgauBot2.0 چات بوتى جانە بالاقورعاۋ ۆەب-سايتى جۇمىس ىستەيدى.
