بەلگىلى اقىن قايتىس بولدى

قازاقستاننىڭ حالىق جازۋشىسى, قازاقستان مەملەكەتتىك سىيلىعىنىڭ لاۋرەاتى, كورنەكتى اقىن تەمىرحان مەدەتبەك قايتىس بولدى, دەپ حابارلايدى qandastar.kz

بۇل تۋرالى قازاقستان جازۋشىلار وداعى باسقارما توراعاسىنىڭ ورىنباسارى, اقىن قاسىمحان بەگمانوۆ الەۋمەتتىك جەلىدە جازدى.

قازاق پوەزياسىنا قۇبىلىس بولىپ كەلگەن, ۇلتتىڭ اسقاق رۋحتى ۇلى اقىنى تەمىرحان مەدەتبەك دۇنيەدەن ءوتتى. قارشادايىمنان ولەڭدەرىن وقىپ, قاسىنا ەرگەن اسىل اعام, قازاقستاننىڭ حالىق جازۋشىسى, قازاقستان مەملەكەتتىك سىيلىعىنىڭ لاۋرەاتى, كورنەكتى اقىن تەمىرحان مەدەتبەكتىڭ دۇنيەدەن وزعانىن قازىر عانا شولپان جەڭگەم ماعان ەڭ ءبىرىنشى حابارلادى. سوڭعى اپتادا تەمىرحان اعامىزدىڭ اۋىر حالدە اۋرۋحاناعا تۇسۋىنە بايلانىستى وتباسىمەن, دارىگەرلەرمەن جازۋشىلار وداعىنىڭ باسشىلارى ۇنەمى حابارلاسىپ تۇردى. قازاقستان جازۋشىلار وداعىنىڭ توراعاسى مەرەكە قۇلكەنوۆ ەكەۋىمىز 2 كۇن بۇرىن بارعاندا جانساقتاۋ بولىمىنە كىرگىزبەگەن سوڭ, مەن «اعا, ءبىز كەلىپ تۇرمىز, جانىڭىزدامىز» دەپ حات جازىپ, قالدىرىپ كەتىپ ەدىم. بۇگىن توراعا مەرەكە قۇلكەنوۆ, ونىڭ كەڭەسشىسى ءامىرجان قوسانوۆ جانە بەلگىلى كاسىپكەر قانات سانىك تورتەۋىمىز الماتىداعى سوۆمين اۋرۋحاناسىنىڭ اعامىز جاتقان جانساقتاۋ بولىمىنە كەزەكپەن كىرىپ, ءۇنسىز باقۇلداسىپ, قوشتاسىپ شىققان ەدىك. ءيا, وتكەندە عانا اعامىزدىڭ 80 جاسىن دۇركىرەتىپ الماتىدا تويلاعان ەدىك. 81 قاراعان شاعىندا ومىردەن ءوتتى. قازىر عانا گەرمانيادان سەرىك تاۋكەباەۆ, الماتىدان قانات اشىربەك ۇلى سىعاي حابارلاستى. الاماندا الدىنا جان سالماي شاپقان داۋىلپاز اقىننىڭ دۇنيەدەن وتۋىنە وراي بۇكىل قازاق حالقىنا, ونىڭ وقىرماندارىنا قاتتى قايعىرىپ, كوڭىل ايتامىن. اقىن تەمىرحان مەدەتبەكتىڭ جانازاسى قاشان شىعاتىنى, قوناقاسى, اسى قايدا بەرىلەتىنى جايلى قوسىمشا حابارلايتىن بولامىز, – دەپ جازدى قاسىمحان بەگمانوۆ.

تەمىرحان مەدەتبەك 1945 جىلى 6 ناۋرىزدا تۇركىستان وبلىسىندا دۇنيەگە كەلگەن. تۇركىستان قالاسىندا ورتا مەكتەپتى تامامداعان سوڭ تۋعان اۋىلىندا كولحوزشى, اۋداندىق گازەتتە كوررەكتور بولىپ جۇمىس ىستەگەن. 1983 جىلى «كوگەرشىن قاۋىرسىندارى» اتتى ولەڭ كىتابى ءۇشىن قازاقستان جازۋشىلار وداعى سىيلىعىنىڭ, ال 2000 جىلى «تاعدىرلى جىلدار جىرلارى» كىتابى ءۇشىن قازاقستان رەسپۋبليكاسى مەملەكەتتىك سىيلىعىنىڭ لاۋرەاتى بولدى. بەيبارىس اتىنداعى سىيلىقتىڭ يەگەرى. «قۇرمەت» وردەنى جانە قۇرمەت گراموتاسىمەن ماراپاتتالعان.

الماتىداعى اباي اتىنداعى مەملەكەتتىك پەداگوگيكالىق ينستيتۋتتىڭ ءتىل-ادەبيەت فاكۋلتەتىندە وقىعان. قازاق تەلەۆيدەنيەسىندە قاتارداعى رەداكتور, ماڭعىستاۋداعى بارلاۋ ەكسپەديتسيالارىندا جۇمىسشى, ودان سوڭ وبلىستىق گازەتتە جۋرناليست, ءبولىم مەڭگەرۋشىسى, قازاقستان جازۋشىلار وداعىنىڭ سول وبلىستاعى ادەبي كەڭەسشىسى, «ەگەمەن قازاقستان» گازەتىنىڭ ماڭعىستاۋ وبلىسىنداعى ءتىلشىسى, ماڭعىستاۋ وبلىستىق تەلە-راديو كوميتەتىنىڭ توراعاسى, قازاقستان جازۋشىلار وداعى باسقارماسىنىڭ ەكىنشى حاتشىسى, «اقيقات», «جۇلدىز» جۋرنالدارىنىڭ باس رەداكتورى بولىپ قىزمەت ەتكەن.

«جانىمنىڭ جاپىراقتارى», «ساپار الدىندا», «الىس شاقىرىمدار», «مارتەبە», «اۋەدەگى تولقىندار», «داۋىس», «كوگەرشىن قاۋىرسىندارى», «اڭقا كەپتىرگەن اڭىزاق», «سىرىم بار ساعان ايتاتىن», «تاعدىرلى جىلدار جىرلارى», «كوك تۇرىكتەر سارىنى», ءىىى تومدىق «تاڭدامالى جىر جيناعى» سەكىلدى وننان استام جىر جيناقتارىنىڭ اۆتورى. «مەنىڭ ابايىم», «بابا ءداستۇردىڭ مۇراگەرى كىم?», «سەگىز قىرلى سەكسەن سىرلى الەم بۇل» اتتى سىن كىتاپتارى, «تولعاۋى توقسان دۇنيە» اتتى پۋبليتسيستيكالىق وي-تولعاۋلار مەن ەسسەلەر كىتابى جارىق كورگەن.

ولەڭدەرى قىرعىز, وزبەك, ۋكراين, ورىس, قىتاي, تاتار تىلدەرىنە اۋدارىلعان. پۋشكين, لەرمونتوۆ, ياكۋب كولاس, يانكا كۋپالا, لەسيا ۋكراينكا, رادوۆان زاگوۆيچ, بودلەر, ۆەرحارن, پابلو نەرۋدا, نەزۆال, ەركين ۆاحيدوۆ, كۋلاكوۆسكي سياقتى اقىنداردىڭ ولەڭدەرىن, سونداي-اق گەنريح بەلدىڭ «يەسىز ءۇي» رومانى مەن ۆلاديمير نابوكوۆتىڭ بىرنەشە شىعارمالارىن تارجىمالاعان.