بەلگىلى عالىم نەسيە الىپ, توي جاسايتىنداردى سىنادى

فوتو: اشىق دەرەككوز

ابايتانۋشى عالىم ومار جالەل ەرتەرەكتە تويدى تەك بايلار جاساعانىن ايتتى, دەپ حابارلايدى qandastar.kz

ابايتانۋشىنىڭ قازاقتىڭ تويى تۋرالى ايتقان ويى الەۋمەتتىك جەلىدە جەلدەي ەستى. ول ءوز سوزىندە نەسيە الىپ توي ىستەيتىندەردى قاتاڭ سىناعان.

«تويدى بۇرىن كىم جاساعان? كەدەي توي جاساماعان عوي. بايلار جاساعان. باي تويدى ماعان بىرەۋ بىردەڭە اكەلەدى دەپ جاساماعان. دۇنيەسى ارتىلىپ جاتقاننان كەيىن ءوزىنىڭ داۋلەتىمەن ءبولىسۋ ءۇشىن ىستەگەن. توي ءتاڭىردىڭ قازىناسى دەگەن ءسوز, ءتاڭىردىڭ قازىناسى بايعا كەلىپ وتىر. باي سونىمەن ءبولىسىپ جاتىر ماعىنانى بىلدىرەدى. ال, سەن قاي جەرىڭمەن توي جاسايسىڭ? كرەديت الىپ جاسايسىڭ. كورپەگە قاراي كوسىلۋ كەرەك. سەن نە بەتىڭمەن توي جاسايسىڭ? قازىر تۇساۋكەسەر, مەكتەپكە بارعان توي, توقىمقاعار, جانە بۇدان دا باسقا نەشە ءتۇرلى تويلار كوبەيىپ كەتتى. سارسەنبى, بەيسەنبى, جۇما توي. ال, سەنبى مەن جەكسەنبى كۇندەرى ونسىز دا توي. سوندا سەن قاشان جۇمىس ىستەيىڭ? ەكونوميكانى قالاي دامىتامىز? ءوزىڭنىڭ جالاقىڭ 250 مىڭ. ءار تويعا 50 مىڭنان اپارساڭ, كرەديتىڭ بار. اقىلعا سىيمايتىن نارسە عوي», — دەيدى ول.

جەلى قولدانۋشىلارىنىڭ بارلىعى دەرلىك ومار جالەلدىڭ ويىمەن كەلىسەتىندەرىن ايتقان.

«شىنىندا العان ايلىعىمىزدىڭ تەڭ جارتىسى نەسيەگە, قالعانى توي-تومالاققا كەتەدى, قىسقارتۋ كەرەك», «زاڭ جۇزىندە تويعا تىيىم سالۋ كەرەك», «قازىرگى كەدەيلەر جىرتىلىپ توي جاساپ, ودان سايىن كەدەيلەنە ءتۇسىپ جاتىر. بۇرىنعىنىڭ كەدەيلەرىندە اقىل بولعان ەكەن», «تويعا نەسيە الىپ بانكتى, تويباستار الىپ قىتايدى بايىتىپ جاتىرمىز», «ۇيلەنۋ توي عانا جاسالىپ, قالعاندارى ۇيدە اتالىپ وتەتىندەي زاڭمەن بەكىتۋ كەرەك», — دەپ جازدى ولار.