Belgili ǵalym nesıe alyp, toı jasaıtyndardy synady

Foto: ashyq derekkóz

Abaıtanýshy ǵalym Omar Jálel erterekte toıdy tek baılar jasaǵanyn aıtty, dep habarlaıdy qandastar.kz

Abaıtanýshynyń qazaqtyń toıy týraly aıtqan oıy áleýmettik jelide jeldeı esti. Ol óz sózinde nesıe alyp toı isteıtinderdi qatań synaǵan.

«Toıdy buryn kim jasaǵan? Kedeı toı jasamaǵan ǵoı. Baılar jasaǵan. Baı toıdy maǵan bireý birdeńe ákeledi dep jasamaǵan. Dúnıesi artylyp jatqannan keıin óziniń dáýletimen bólisý úshin istegen. Toı táńirdiń qazynasy degen sóz, táńirdiń qazynasy baıǵa kelip otyr. Baı sonymen bólisip jatyr maǵynany bildiredi. Al, sen qaı jerińmen toı jasaısyń? Kredıt alyp jasaısyń. Kórpege qaraı kósilý kerek. Sen ne betińmen toı jasaısyń? Qazir tusaýkeser, mektepke barǵan toı, toqymqaǵar, jáne budan da basqa neshe túrli toılar kóbeıip ketti. Sársenbi, beısenbi, juma toı. Al, senbi men jeksenbi kúnderi onsyz da toı. Sonda sen qashan jumys isteıiń? Ekonomıkany qalaı damytamyz? О́zińniń jalaqyń 250 myń. Ár toıǵa 50 myńnan aparsań, kredıtiń bar. Aqylǵa syımaıtyn nárse ǵoı», — deıdi ol.

Jeli qoldanýshylarynyń barlyǵy derlik Omar Jáleldiń oıymen kelisetinderin aıtqan.

«Shynynda alǵan aılyǵymyzdyń teń jartysy nesıege, qalǵany toı-tomalaqqa ketedi, qysqartý kerek», «Zań júzinde toıǵa tyıym salý kerek», «Qazirgi kedeıler jyrtylyp toı jasap, odan saıyn kedeılene túsip jatyr. Burynǵynyń kedeılerinde aqyl bolǵan eken», «Toıǵa nesıe alyp bankty, toıbastar alyp Qytaıdy baıytyp jatyrmyz», «Úılený toı ǵana jasalyp, qalǵandary úıde atalyp ótetindeı zańmen bekitý kerek», — dep jazdy olar.