جاڭالىقتار
بەلگىلى كاسىپكەر تۇرسىن الاگوزوۆ قىزمەتكەرلەرىنە 100 پاتەر سىيلادى
فوتو: اشىق دەرەككوز
«GALANZ BOTTLERS» اق باسشىسى, تانىمال كاسىپكەر تۇرسىن الاگوزوۆ بۇگىن ەرەكشە قايىرىمدىلىق جاساپ, كومپانياسىنداعى 100 قىزمەتكەرگە پاتەر سىيلادى. بۇل تۋرالى كاسىپكەردىڭ جارى بەلگىلى پروديۋسەر بايان الاگوزوۆا الەۋمەتتىك جەلىدەگى پاراقشاسىندا بەينەجازبا جاريالادى, دەپ حابارلايدى qandastar.kz
كاسىپكەر اۋقىمدى الەۋمەتتىك باستاما تۋرالى وي 2024 جىلى پايدا بولعانىن ايتتى.
«ولار – كوپ جىل بويى كومپانيادا ەڭبەك ەتىپ كەلە جاتقان قاراپايىم جۇمىسشىلار. ارنايى كوميسسيا قۇرىلىپ, مۇقتاج قىزمەتكەرلەردى انىقتادى. كوپشىلىگىنىڭ ءومىر بويى ءوز باسپاناسى بولماعان», – دەدى الاگوزوۆ.
باسپانالى بولعانداردىڭ باسىم كوپشىلىگى كومپانيانىڭ قاراپايىم قىزمەتكەرلەرى – ەدەن جۋشىلار, جۇك تاسۋشىلار, جۇرگىزۋشىلەر مەن تەحنيكالىق قىزمەتكەرلەر ەكەن دە اتاپ ءوتتى باسشى.
كومپانيانىڭ الەۋمەتتىك جەلىدەگى پاراقشاسىندا قۇتتىقتاۋ جازباسىن جاريالادى.
«GALANZ bottlers» كومپانياسى الەۋمەتتىك جاۋاپكەرشىلىك قاعيداتتارىن بەرىك ۇستانا وتىرىپ, كاسىپورىننىڭ دامۋىنا ەلەۋلى ۇلەس قوسقان قىزمەتكەرلەرگە پاتەر كىلتتەرىن تابىستادى. كومپانيانىڭ نەگىزىن قالاۋشى تۇرسىنعالي تۇرىم ۇلى پاتەر كىلتتەرىن ءوزى تابىستاي وتىرىپ, ءاربىر قىزمەتكەرگە ادال قىزمەتى ءۇشىن العىس ءبىلدىردى. پاتەرلەر «Hayat Construction Group» كومپانياسى سالىپ جاتقان زاماناۋي تۇرعىن ءۇي كەشەندەرىنەن بەرىلۋدە. قىزمەتكەرلەردىڭ العاشقى لەگى جازدا قونىستانسا, كەيىنگى تولقىن كۇزدە جاڭا باسپانالارىنا كوشەتىن بولادى.
قۇرمەتتى ارىپتەستەر, كوپتەن كۇتكەن قونىس تويلارىڭىز قۇتتى بولسىن! شاڭىراقتارىڭىزدا شاتتىق ۇيالاپ, بەرەكە-بىرلىك ورناسىن!
سىزدەر بۇل قۋانىشقا شىن جۇرەكتەن لايىقتىسىزدار!» – دەپ جازدى.
Jastar Janarۋ جازعانداي, كاسىپكەردىڭ جارى بايان الاگوزوۆا قۋانىشتى جاڭالىقتى بولىسكەن بەينەجازباسىندا:
– بۇگىن پاتەر العان بارلىق قىزمەتكەرلەر ءۇشىن قۋانىشتىمىن, – دەي كەلە, – كۇيەۋىمنىڭ جومارت جانە مەيىرىمدى بولمىسى ءۇشىن وتە قۋانىشتىمىن. ول الەۋمەتتىك جاۋاپكەرشىلىكتى سەزىنىپ, كومپانياسىندا جۇمىس ىستەيتىن قىزمەتكەرلەردى ويلاپ وسىنداي سىيلىق جاسادى. پرەزيدەنتىمىز بيزنەس وكلىدەرىنىڭ الەۋمەتتىك جاۋاپكەرشىلىگى جايلى ءجيى ايتادى. سوندىقتان باسقا كاسىپكەرلەردى دە وسىنداي جاۋاپكەرشىلىكتى سەزىنۋگە شاقىرامىن, – دەدى پروديۋسەر.
جيىنعا قاتىسقان قىزمەتكەرلەر بۇل جاڭالىقتى بىلمەگەنىن, ماراپات تابىستالادى دەپ ويلاعاندارىن دا جەتكىزدى بايان الاگوزوۆا.
