جاڭالىقتار
بەلگىلى كوۋچ: مىقتىلىعىن كورسەتكىسى كەلەتىن ەركەكتەن ايەل ەندى كەتۋگە قورىقپايدى
فوتو: اشىق دەرەككوز
بەلگىلى كوۋچ, بلوگەر, كاسىپكەر روزا اشىرباەۆا ەر-ازاماتتارعا ۇندەۋ تاستادى. ول ەندىگى جەردە قىز-كەلىنشەكتەردىڭ بۇرىنعىداي زورلىق-زومبىلىققا شىداپ جۇرە بەرمەيتىنىن ايتتى. جانە ەر-ازاماتتاردى ءوز ايەلدەرىن قۇرمەتتەۋگە شاقىردى, – دەپ حابارلايدى ernur.kz
«ايەل ەمانسيپاتسياسىنا, ونىڭ تاڭداۋ ەركىندىگى بار ەكەنىنە, ەركەكتىڭ ايتقانىمەن ەندى جۇرمەيتىنىنە ۇيرەنىسە الماي جۇرگەن ەر-ازاماتتار كوپ. مەن ولاردى تۇسىنەمىن. بۇل جاڭا رەالنوست, جاڭا ەرەجەلەر جانە بۇل پروتسەسس ەندى توقتامايدى. ايەل ەركەككە ەندى باعىنبايدى, تۇسىنەسىزدەر مە? بۇل مۇمكىن ەمەس, ويتكەنى ءبىلىمدى, ەركىن ادام ءوز بوستاندىعىن بىرەۋدىڭ قولىنا ۇستاتپايدى. ايەلدىڭ جەتىستىگىنە شىن قۋانا الاتىن, جاناشىر دوس, مىقتى قورعان, سىرلاس جانە مۇڭداس ەر ازاماتقا عانا ايەل ءوز ەركىمەن مويىنسۇنادى. كوكىرەگىن قاعىپ, «مەن ەركەكپىن» دەپ, ايەلدى تومەندەتۋ ارقىلى ءوز «مىقتىلىعىن» كورسەتكىسى كەلەتىن ەركەكتەردەن ايەل ەندى كەتۋگە قورىقپايدى», – دەدى روزا اشىرباەۆا.
ول سونداي-اق, الەۋمەتتىك جەلىدە وزىنە وتباسىلىق ماسەلەلەرىن ايتىپ ايەلدەردىڭ حات جازاتىنىن جەتكىزدى.
«وتكەندە ءبىر كەلىنشەك «6 بالامدى الىپ, ابيۋزەردەن كەتتىم, ۋرااا!» دەپ جازىپ جىبەرىپتى. ايەل ەندى ءوزىن قورلاعان ەركەكتەن كەتكەندە توي جاسايدى. سوندىقتان ەندى ەرلەرگە وزگەرۋ كەرەك. ايەل قورقىپ, تاياق جەپ ءومىر سۇرگىسى كەلمەيدى, ول ەندى تەك قانا ءوزىن سىيلاعان جانە باعالاعان ەر ازاماتقا مويىنسۇنعىسى كەلەدى», – دەدى بەلگىلى كوۋچ.
