Belgili pedagog: Ǵanı Beısembaev qyzmetinen ketsin

Foto: halyq-uni.kz

Bilim salasyndaǵy ózekti problemalardy kóterip júrgen maman jáne ustaz Aıatjan Ahmetjan «Kultobe» podkastynda oqý-aǵartý mınıstrliginiń jumysyn synady, — dep habarlaıdy Massaget.kz tilshisi.

Aıatjan Ahmetjannyń aıtýynsha, oqý-aǵartý mınıstrliginiń qabyldaǵan keı ózgeristeri jemqorlyqtyń órshýine ákelýi múmkin.

«Aımaǵambetovtyń kezinde bolǵan naqty eki ózgeriske toqtalaıyn. Ashat Aımaǵambetov oqýshyny qalanyń ishinen bir óńirge toqsannyń úzilisinen basqa ýaqytta aýystyrýǵa bolmaý týraly norma qoıyp tastady. Bıyl ony alyp tastady. Ony alyp tastaý qandaı másele týdyrady? Mysaly, jekemenshik mektepter ár aıdyń 15-i kúni memleketke ózinde oqyp jatqan bala jaıly tizim ótkizedi. Al endi erteń jekemenshik mektepter memlekettik mektepterden balany ákeledi de, 10 kún turǵyzady da, ony ata-anasy da bilmeı qalady, qaıtip ózine jiberip tastaıdy. Mundaı jemqorlyq faktileri týady. Sosyn 25 mamyr sabaq bitedi, 23 mamyr kúni aýysyp turǵanyna tańǵalýdyń qajeti joq. Tártipke kelip qalyp edi, sol tártipti qaıtadan buzyp jiberdi», — deıdi ustaz.

Maman jaǵymsyz saldarǵa ákelýi múmkin taǵy bir ózgeris jaıly aıtyp berdi.

«1 synypqa oqýshy qabyldaýdy zańmen 31 shildede aıaqtaıtyn etip edi. Ony qazirgi mınıstr Ǵanı Beısembaev qaıtadan 31 tamyzǵa ysyryp tastady. Ol ne nársege ákeledi? Jurt 31 shildege deıin qujatyn tapsyryp bolady, mektep dırektory tamyz aıynda «meniń mektebime qansha oqýshy keldi» de, oqýlyǵyn, kabınetin jáne muǵalimin daıyndaıdy. Endi qazir qalada dırektor tamyzdyń sońyna deıin neshe synyp ashylatynyn bilmeı otyrady. Sosyn 1 qyrkúıekte sabaq bastalady, ne oqýlyq jetispeıdi, al artyq oqýlyq alyp qoısa, memleket «nege artyq oqýlyq alasyń, qarjyny tıimdi paıdalanbadyń» dep qysady. Muny dırektor bolǵan adam ǵana túsinedi. Sondyqtan da qoǵamda qyzý talqylanbaıdy», — deıdi ol.

Ol jańa oqý jylynda jańa mınıstr kórgisi keletinin jasyrmady.

«Durys júıege túsken nárseni qurtyp jatsa, men qalaı qazirgi mınıstrdiń jumysyn durys baǵalaımyn? Men Ǵanı Beısembaevtyń qyzmetinen ketkenin qalaımyn. Jańa oqý jylynda jańa mınıstr kórgim keledi. Qoryqpaı, jurt synasa da, durys sheshim qabyldaı alatyn mınıstr kórgim keledi», — deıdi Aıatjan Ahmetjan.