بەلسەندى ماكس بوقاي نۇربانك باسشىلىعىنا كەلۋى مۇمكىن

فوتو: ulysmedia

مۇنداي ۇسىنىس مينوريتارلىق اكتسيونەردەن كەلىپ ءتۇستى, دەپ حابارلايدى qandastar.kz malim.kz سايتىنا سىلتەمە جاساپ.

قوعام بەلسەندىسى ماكس بوقاي جاقىن ارادا نۇربانكتىڭ ديرەكتورلار كەڭەسىنە مۇشە بولۋعا ۇسىنىلادى. بۇل اكتسيونەرلەردىڭ جالپى جينالىسىندا تالقىلانباق.

ايتا كەتەيىك, ماكس بوقاي 2016 جىلى جەر ميتينگىلەرىن ۇيىمداستىرۋشى رەتىندە تانىمال بولعان قوعام بەلسەندىسى. ميتينگىلەر جەر كودەكسىنە ەنگىزىلگەن جاڭا تۇزەتۋلەرگە قارسى ۇيىمداستىرىلعان ەدى.
اكتسيونەرلەردىڭ جالپى جينالىسى 2024 جىلعى 8 قاراشاعا جوسپارلانعان.
بانكتىڭ قازىرگى ديرەكتورلار كەڭەسىنىڭ توراعاسى – راۋشان ەرجانوۆ. ول 2010 جىلدان باستاپ بانكتىڭ دك قۇرامىنا كىرەدى.
وسى تۇستا سارسەنوۆتار وتباسى JP Finance Group ارقىلى نۇربانكتىڭ 86,4% اكتسيالارىنا يەلىك ەتەتىنىن دە ايتا كەتەيىك.
اقپاراتقا قاتىستى نۇربانك مالىمدەمە جاساپ, تەك رەسمي اقپاراتقا سەنۋگە شاقىردى.
«2024 جىلعى 08 قاراشادا «نۇربانك» اق اكتسيونەرلەرىنىڭ كەزەكتەن تىس جينالىسى وتەدى. جينالىستىڭ كۇن ءتارتىبى بانكتىڭ رەسمي سايتىندا «اكتسيونەرلەر» بولىمىندە جاريالانعان جانە ديرەكتورلار كەڭەسىنىڭ ساندىق قۇرامىن ايقىنداۋ جانە باسقارۋ ورگانىنىڭ مۇشەلەرىن تاعايىنداۋ تۋرالى ماسەلەلەردى قامتيدى.

قازىرگى ۋاقىتتا «نۇربانك» اق ديرەكتورلار كەڭەسىنىڭ توراعاسى – ەرجانوۆا راۋشان زەينوللاقىزى, ال ەلدار سارسەنوۆ – بانكتىڭ ماجوريتارلى اكتسيونەرى. «اكتسيونەرلىك قوعامدار تۋرالى» زاڭعا سايكەس مينوريتارلىق اكتسيونەر تاۋەلسىز ديرەكتور – ديرەكتورلار كەڭەسىنىڭ مۇشەسى كانديداتۋراسىن ۇسىنۋعا قۇقىلى. ديرەكتورلار كەڭەسىنىڭ قۇرامى تۋرالى شەشىم اكتسيونەرلەردىڭ كوپشىلىك داۋسىمەن قابىلدانادى», – دەپ مالىمدەدى بانك.