جاڭالىقتار
بەردەنوۆكە جاسالعان قاستاندىق 3,4 ملرد تەڭگەگە بايلانىستى بولۋى مۇمكىن – دەرەككوز
شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان قاستاندىق 3,4 ملرد تەڭگەگە بايلانىستى بولۋى مۇمكىن, دەپ حابارلايدى qandastar.kz Bes.Media-عا سىلتەمە جاساپ.
قالا اكىمدىگى مەن Respublica پارتياسىنداعى دەرەككوزدەردىڭ مالىمەتىنشە, بۇل قاراجات كوپقاباتتى تۇرعىن ۇيلەردى كۇردەلى جوندەۋدەن وتكىزۋ ءۇشىن بيۋدجەتتەن بولىنگەن. اتالعان قارجىنى “تۇرعىن ءۇي شىمكەنت” جشس يەلەنگەن, ال كومپانيانى كۇدىكتى ەرنار جيەنباي باسقارادى.
قاستاندىق جاسالاردان ون كۇن بۇرىن اكىمدىكتە وتكەن جيىندا جيەنباي اگرەسسيۆتى مىنەز تانىتىپ, زالدان شىعارىلعان. وسى وقيعادان كەيىن ونى باسشىلىق قىزمەتىنەن بوساتۋ ماسەلەسى كوتەرىلگەن.
كومپانيا 2024–2026 جىلدارعا ارنالعان 3,4 ملرد تەڭگەنى تەندەر وتكىزبەي العان. دەرەككوزدەردىڭ ايتۋىنشا, بۇل قاراجات جيەنباي تاراپىنان ماقساتسىز جۇمسالعان نەمەسە جىمقىرىلعان بولۋى مۇمكىن. قازىرگى ۋاقىتتا قىزمەتتىك تەكسەرۋ جۇرگىزىلىپ جاتىر.
ايتا كەتەيىك, قالا اكىمى رۋسلان بەردەنوۆتى قۇرىلىس سالاسىنداعى ءتارتىپتى رەتتەۋ ماقساتىندا ورىنباسار ەتىپ تاعايىنداعان بولاتىن.
