«بەس ادامدى ولتىرگەن»: اقمولا وبلىستىق سوتى 20 جىل بويى جالعان قۇجاتپەن جاسىرىنىپ كەلگەن باندا باسشىسىنا ۇكىم شىعاردى

فوتو: Pixabay

اقمولا وبلىستىق سوتى اسا اۋىر قىلمىس جاسادى دەپ ايىپتالعان باندا باسشىسىنا ۇكىم شىعاردى. ول بەس ادامدى ءولتىرىپ, ءتۇرلى قىلمىس جاساعاننان كەيىن 20 جىلداي جاسىرىنىپ جۇرگەن. بۇل تۋرالى Stan.kz اقپارات اگەنتتىگى حابارلايدى.

ءىس ماتەريالدارىنا سايكەس, ازامات ك. 1998 جىلدىڭ قاڭتارى مەن 1999 جىلدىڭ قاڭتارى ارالىعىندا بوتەننىڭ مۇلكىنە شابۋىل جاساۋ جانە ۇرلاۋ ءۇشىن قارۋلى توپ قۇرعان. سونىمەن قاتار ول بەس ادامدى ءولتىردى دەپ ايىپتالدى.

ول جالعان قۇجاتتاردى پايدالانىپ 20 جىلدان استام ۋاقىت بويى جاسىرىنىپ جۇرگەن.

“سوت كۋاگەرلەردىڭ ايعاقتارى مەن ساراپتامالاردىڭ قورىتىندىلارى, سونداي-اق اقمولا وبلىستىق سوتىنىڭ 1999 جىلعى 13 جەلتوقسانداعى ك. ۇيىمداستىرعان قارۋلى توپتىڭ باسقا دا فيگۋرانتتارىنا قاتىستى زاڭدى كۇشىنە ەنگەن ۇكىمى نەگىزىندە ك. – نىڭ كىناسىن انىقتادى.

سوت جازانى تاعايىنداۋ كەزىندە جابىرلەنۋشىلەردىڭ وتىنىشتەرىن ەسكەردى. ولار قاتاڭ شارا تاعايىنداۋدى سۇرادى”, – دەلىنگەن حابارلامادا.

سونداي-اق, ك.-نىڭ قىلمىستىق جاۋاپكەرشىلىگىن اۋىرلاتاتىن ءمان-جايلار دا ەسكەرىلگەن. ول قىلمىستىق قۇقىق بۇزۋشىلىق جاساۋ كەزىندە قارۋ قولدانىپ, بيلىك وكىلىنىڭ ارنايى كيىمىن كيگەن.

“قىلمىستىق كودەكستىڭ 96-بابىنىڭ 2-بولىگى بويىنشا (1997 جىلعى رەداكتسيادا) سۋديا قىلمىستىق-اتقارۋ جۇيەسى مەكەمەسىندە توتەنشە قاۋىپسىزدىكتى وتەي وتىرىپ, ءومىر بويىنا باس بوستاندىعىنان ايىرۋ تۇرىندەگى جازانى تاعايىندادى.

قك-ءنىڭ 69-بابىنىڭ 5-بولىگىنە سايكەس (1997 جىلعى رەداكتسيادا) ءومىر بويىنا باس بوستاندىعىنان ايىرۋ 25 جىلعا باس بوستاندىعىنان ايىرۋمەن اۋىستىرىلدى. ۇكىم زاڭدى كۇشىنە ەنگەن جوق”, – دەلىنگەن حابارلامادا.