بەس مينۋت قالعاندا كىرگىزەدى: اقتاۋدا مەكتەپ الدىنا جينالعان وقۋشىلار ءبىرىن-ءبىرى تاپتاپ كەتە جازدادى

فوتو ۆيدەوكادردان سكرينشوت جاسالعان

اقتاۋداعى №19 ورتا مەكتەپتە وقيتىن بالالاردىڭ اتا-انالارىنىڭ ايتۋىنشا, ەكىنشى اۋىسىمدا وقيتىن وقۋشىلار رۇقسات بەرمەيىنشە دالادا تۇرۋعا ءماجبۇر بولعان. بۇل تۋرالى Stan.kz اقپارات اگەنتتىگى Lada.kz پورتالىنا سىلتەمە جاساپ حابارلايدى.

اتا-انالاردىڭ ايتۋىنشا, ەكىنشى اۋىسىمدا وقيتىن بالالاردى كوشەدە تۇرۋعا ماجبۇرلەپ, رۇقساتسىز كىرگىزبەيدى.

«مەنىڭ قىزىم ۇنەمى مەكتەپكە كىرۋ قيىن ەكەنىن ايتىپ جۇرەدى, ويتكەنى ولار ساباققا 5 مينۋت قالعاندا كىرەدى. مەن بارىپ, ءوزىم كورۋدى ءجون كوردىم. شىنىندا دا. بارلىعى كىرىڭدەر دەمەيىنشە سىرتتا تۇرادى. سودان كەيىن بالالار سىنىپقا جەتۋ ءۇشىن ەسىكتەن سىعىلىسىپ كىرەدى. مەن ۆاحتادان نەگە بۇلاي دەپ سۇرادىم, ماعان بۇل ديرەكتوردىڭ بۇيرىعى دەپ جاۋاپ بەردى», – دەدى انالاردىڭ ءبىرى.

ايتا كەتەيىك, قالالىق ءبىلىم ءبولىمى جاعدايدى باقىلاۋعا العانىن حابارلادى. اتا-انالار كۇن سايىن وسىلاي بولادى دەسە دە, مەكتەپ اكىمشىلىگى بۇگىنگى وقيعا تەك ءبىر رەت بولعانىن ايتادى.

«ساعات 13:45-تە مەكتەپتە جينالىس وتكىزىلدى, وسىعان بايلانىستى كەزەكشى مۇعالىم ۋاقىتىندا تۇسە المادى. وسى ۋاقىتتا كىرەبەرىستە بالالار جينالىپ قالعان. مەكتەپتە 3 بلوك جانە ارقايسىنا جەكە كىرەتىن ەسىك بار. بۇگىنگى جاعداي تەك ءبىر بلوكتا وسىلاي بولدى. كۇندەلىكتى كەزەكشىلىك باقىلانادى. وسى جاعدايعا بايلانىستى جاۋاپكەر ادامدارعا ەسكەرتۋ بەرىلدى», – دەلىنگەن ءبىلىم باسقارماسىنىڭ جاۋابىندا.

ەسكە سالايىق, بۇعان دەيىن استانادا «جەتىسۋ» ساياباعىنداعى تەگىن تاراتقان راۋشان گۇلدەرىنە قاۋمالاعان ادامدار ءبىر-بىرنە كەپتەلىپ, قىسىلىپ قالعانىن جازدىق. وقيعانىڭ ۆيدەوسى جەلىدە پايدا بولدى. مۇمكىندىگىنشە كوپ گۇل الۋعا تىرىسىپ, ءبىر-ءبىرىن يتەرگەن ادامدار جۇرتشىلىقتىڭ اشۋىنا ءتيدى. كوپشىلىكتىڭ اراسىندا بالالار دا بولعان. بىراق گۇلگە تالاسقان ەرەسەكتەر ولاردى ەسكەرمەگەنى كورىنەدى. سەبەبى كادرلاردا «ابايلاڭىز, بالا» دەپ ايقايلاعان داۋىس شىققان.