Bes mınýt qalǵanda kirgizedi: Aqtaýda mektep aldyna jınalǵan oqýshylar birin-biri taptap kete jazdady

Foto vıdeokadrdan skrınshot jasalǵan

Aqtaýdaǵy №19 orta mektepte oqıtyn balalardyń ata-analarynyń aıtýynsha, ekinshi aýysymda oqıtyn oqýshylar ruqsat bermeıinshe dalada turýǵa májbúr bolǵan. Bul týraly Stan.kz aqparat agenttigi Lada.kz portalyna silteme jasap habarlaıdy.

Ata-analardyń aıtýynsha, ekinshi aýysymda oqıtyn balalardy kóshede turýǵa májbúrlep, ruqsatsyz kirgizbeıdi.

«Meniń qyzym únemi mektepke kirý qıyn ekenin aıtyp júredi, óıtkeni olar sabaqqa 5 mınýt qalǵanda kiredi. Men baryp, ózim kórýdi jón kórdim. Shynynda da. Barlyǵy kirińder demeıinshe syrtta turady. Sodan keıin balalar synypqa jetý úshin esikten syǵylysyp kiredi. Men vahtadan nege bulaı dep suradym, maǵan bul dırektordyń buıryǵy dep jaýap berdi», – dedi analardyń biri.

Aıta keteıik, qalalyq bilim bólimi jaǵdaıdy baqylaýǵa alǵanyn habarlady. Ata-analar kún saıyn osylaı bolady dese de, mektep ákimshiligi búgingi oqıǵa tek bir ret bolǵanyn aıtady.

«Saǵat 13:45-te mektepte jınalys ótkizildi, osyǵan baılanysty kezekshi muǵalim ýaqytynda túse almady. Osy ýaqytta kireberiste balalar jınalyp qalǵan. Mektepte 3 blok jáne árqaısyna jeke kiretin esik bar. Búgingi jaǵdaı tek bir blokta osylaı boldy. Kúndelikti kezekshilik baqylanady. Osy jaǵdaıǵa baılanysty jaýapker adamdarǵa eskertý berildi», – delingen bilim basqarmasynyń jaýabynda.

Eske salaıyq, buǵan deıin Astanada «Jetisý» saıabaǵyndaǵy tegin taratqan raýshan gúlderine qaýmalaǵan adamdar bir-birne keptelip, qysylyp qalǵanyn jazdyq. Oqıǵanyń vıdeosy jelide paıda boldy. Múmkindiginshe kóp gúl alýǵa tyrysyp, bir-birin ıtergen adamdar jurtshylyqtyń ashýyna tıdi. Kópshiliktiń arasynda balalar da bolǵan. Biraq gúlge talasqan eresekter olardy eskermegeni kórinedi. Sebebi kadrlarda «abaılańyz, bala» dep aıqaılaǵan daýys shyqqan.