«بەس ۋاقىت ناماز وقيمىن»: داستان ساتپاەۆ ءدىني كوزقاراسى تۋرالى ايتتى

الماتىنىڭ «قايرات» كلۋبى مەن قازاقستان ۇلتتىق قۇراماسىنىڭ شابۋىلشىسى داستان ساتپاەۆ ومىرىندە دۇعانىڭ ماڭىزدى ورىن الاتىنىن ايتتى, دەپ حابارلايدى Qandastar.kz 1bol.kz-كە سىلتەمە جاساپ. 

«ءبىز كۇنىنە بەس ۋاقىت ناماز وقيمىز. بۇل ەڭ الدىمەن رۋحاني تۇرعىدان ماعان كومەكتەسەدى. مەن مۇنىڭ ءبارى اللادان ەكەنىن تۇسىنەمىن جانە ونىڭ جاردەمىن سەزەمىن», – دەدى ول نوبەل ارۋستاميانعا بەرگەن سۇحباتىندا.

ساتپاەۆتىڭ ايتۋىنشا, رۋحاني تاجىريبە وعان تەك ىشكى دۇنيەسىندە عانا ەمەس, كاسىبي سالاسىندا دا قولداۋ كورسەتەدى. ول دۇعادا ايتقان تىلەكتەرىنىڭ كوبىسى ۋاقىت وتە كەلە ورىندالعانىن جەتكىزدى.

«مىسالى, مەنى ەۋروپالىق كلۋبتاردىڭ بىرەۋى بايقاسا ەكەن دەپ دۇعا ەتتىم. بۇل ارمانىم ورىندالدى», – دەپ ءبولىستى داستان.

ول ءۇشىن يمان – كۇش پەن سەنىمدىلىكتىڭ قاينار كوزىنە اينالعان. فۋتبولشىنىڭ ايتۋىنشا, دۇعا ادامنىڭ ءوز ەڭبەگىمەن ۇشتاسقاندا عانا ناتيجە بەرەدى.