«بەس جاس ۇلكەن جىگىت زورلادى»: 15 جاستاعى قازاقستاندىق قىز ءوزىن كۇشپەن تۇرمىسقا بەرگەنىن مالىمدەدى

فوتو: اشىق دەرەككوز

جەلىدە اتىراۋدا 15 جاستاعى قىز وزىنەن بەس جاس ۇلكەن جىگىتتىڭ زورلاعانىن ايتىپ, شاعىمىن بىلدىرگەنى تۇسىرىلگەن ۆيدەو تارادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

جەلىدە تاراعان كادرلاردا قىز كوپشىلىكتەن جىلاپ, كومەك سۇراعان. جابىرلەنۋشى قىزدىڭ سوزىنشە, وسى وقيعادان كەيىن ول وزىنە زورلىق-زومبىلىق كورسەتكەن قىزعا تۇرمىسقا شىعىپتى.

“مەنى 20 جاسار جىگىت زورلادى. پوليتسياعا ارىز جازدىم. بىراق ونىڭ وتباسى ءبىزدىڭ سوڭىمىزدان جۇگىرىپ, كەلىن قىلىپ الامىز, ارىزدارىڭدى قايتىپ الىڭدار دەدى. مۇنداي وتىنىشپەن سول اۋلەتتىڭ ۇلكەن كىسىلەرى كەلدى. انام قازاقىلىققا سالىنىپ, ەكى جاق كەلىسىپ, وسى جىلى 15 مامىر كۇنى سول جىگىتكە تۇرمىسقا شىقتىم”, – دەيدى قىز.

قىزدىڭ سوزىنشە, ونى كۇيەۋى ۇرىپ-سوعىپ, بالاعاتتاپ قايتا ۇيىنە اكەلىپ تاستاپتى.

“اياعىم اۋىر بولعان سوڭ دارىگەرگە تىركەلۋگە بارعاندا “18 جاس جوق” دەپ ميليتسيا شاقىرىلىپ, جىگىتتىڭ ۇستىنەن ءىس قوزعايمىز دەدى. سول كەزدە ەنەم تەرگەۋشىلەرگە اقشا بەرىپ, ءىستى جاپتى. قۇقىق قورعاۋ ورگاندارىندا تۋىستارى بار ەدى. سولارعا وتىرىك ۋدز قاعازىن جاساتىپ, بالاسىن جازادان قۇتقارىپ قالدى. كۇيەۋىمنىڭ ەسىمى ماراتوۆ ماقسات باقىتجان ۇلى. ولار مەنى وقىتامىز دەپ, جالىنىپ ءجۇرىپ العان ەدى. قازىر وقىتپاق تۇگىلى, مەنى ۇيىندە ۇرىپ-سوعىپ, بالاعاتتاپ, المايمىز دەپ ۇيىمە اكەلىپ تاستادى. اياعىم اۋىر, ءتورت اي بولدى. انام وسى جايتتى ەستىپ اۋرۋحاناعا ءتۇستى”, – دەيدى قىز.

جابىرلەنۋشى ەندى پوليتسياعا ارىزدانايىن دەسە, ەنەسى ساتىپ الامىز دەپتى.

“ەنەمە نە ىستەپ قويعانىمدى تۇسىنبەدىم. كەلىندىك مىندەتىمدى تۇگەلدەي اتقارىپ ءجۇرمىن. مەنى وسىلاي الداعاندارىڭىز ءۇشىن زاڭ الدىندا جاۋاپ بەرەسىزدەر دەسەم, قۇتىلىپ كەتەمىز دەپ, جىلاتىپ وتىر. بۇلار زاڭدى ساتىپ الىپ وتىر. قۇقىق قورعاۋ ورگانىندا ىستەيتىن اعايىنى بار. سوسىن ەكومەدتە ابىسىنى ديرەكتور قىزمەتىن اتقارادى. سوعان جالعان ۋدز قاعازىن جاساتىپ, تاپسىرىپ, مەنى مەكتەپ, پوليكلينيكا جانە ءۇيىنىڭ تىركەۋىنەن شىعارىپ تاستادى. ولار ەرتەڭ زاڭدى ساتىپ الىپ, بالاسى تايراڭداپ جۇرە مە دەپ قورقامىن”, – دەيدى قىز.

اتالعان جاعدايعا قاتىستى جابىرلەنۋشى قىزدىڭ وزىمەن Stan.kz ءتىلشىسى بايلانىسىپ كوردى. دەگەنمەن ول 20 جاستاعى كۇيەۋىمەن قايتا تاتۋلاسقانىن ايتتى. سوسىن اتىراۋ وبلىستىق پوليتسيا دەپارتامەنتىنەن ءمانجايدى سۇراپ بىلدىك.

“اتالعان دەرەك بويىنشا قىلمىستىق ءىس تىركەلدى. العاشقى تەرگەۋ بارىسىندا  قىلمىس قۇرامىن تولىققاندى تەرگەۋ ءۇشىن جابىرلەنۋشى تاراپ ءتيىستى سوت-مەديتسينالىق, پسيحياتريالىق ساراپتامالارىنان وتۋدەن باس تارتىپ كەشەندى تەرگەۋ ارەكەتتەرىن جۇرگىزۋدە كەدەرگىلەر كەلتىرگەن. الەۋمەتتىك جەلىدە تارالعان مالىمەتتەر بويىنشا تەرگەۋ جاڭعىرتىلىپ, تەكسەرىلەدى”, – دەلىنگەن حابارلامادا.

ايتا كەتەيىك, بۇعان دەيىن اياگوزدىك ءجاسوسپىرىم قىز تۋىسقان اعاسى زورلاعانىن ايتقان ەدى. ايتۋىنشا, اعاسى ەركەبەك جۇماحانوۆ قىز 6 جاستا كەزدە وزىنىڭ جىنىس مۇشەسىن كورسەتىپ, ونى پورنوگرافيا كورۋگە ماجبۇرلەگەن.