بەت سۇيەگى سىنعان: تارازدا دەپۋتات سوققىعا جىعىلدى

فوتو: instagram.com/nureke_altynbekovih

الەۋمەتتىك جەلىدە تارازدا الماتى وبلىسى ىلە اۋداندىق ءماسليحات دەپۋتاتى نۇرلان بايعازيەۆتىڭ اياۋسىز سوققىعا جىعىلعانى تۋرالى اقپارات تارادى, دەپ جازدى qandastar.kz

پوليتسەيلەر بۇل دەرەكتى راستادى. بۇل تۋرالى Stan.kz اقپارات اگەنتتىگى حابارلايدى.

دەپۋتاتتىڭ ءوزىنىڭ ايتۋىنشا, وقيعا 13 مامىر كۇنى كەشكى 17:30 شاماسىندا قالاداعى ءدامحانالاردىڭ بىرىندە بولعان. ول تارازعا جۇمىس ساپارىمەن بارعان.

“تارازعا الاياقتىق فاكتىلەرى, باسقا دا رەزونانستى ىستەر بويىنشا كەڭەس بەرۋگە كەلگەنمىن. كەڭەس الۋشىلاردىڭ ءبىرى پوليتسيا دەپارتامەنتى ماڭىنداعى دامحاناعا شاقىردى. ول جەرگە تۇستە باردىم. اراسىندا پوليتسيا دەپارتامەنتىنە بارىپ كەلدىم. ساعات بەستەر شاماسىندا تەلەفونىمنىڭ قۋاتى ءسونىپ بارا جاتقان سوڭ, قۋاتتاپ الماق بولدىم. تەلەفونىمدى قۋات كوزىنە قوسىپ, قولىما ۇستاپ تۇرعانىمدا دامحانادا وتىرعانداردىڭ ءبىرى قاسىما كەلىپ, “بۇل جەردە قۋاتتاما, باسقا جەرگە اپار” دەپ ماعان قوقان-لوقى كورسەتە باستادى. وعان بۇل جەردە بارلىعى ورتاق ەكەنىن ايتتىم. ول قارا سومكەسىنەن بىردەڭە الىپ كەلە جاتتى. مەن ونى ۆيدەوعا ءتۇسىرىپ تۇردىم. سول كەزدە قاسىما كەلىپ, قالاي ۇرعانىن بىلمەيمىن, سول جاق بەتىمنەن ۇردى. ەسىمنەن تانىپ قالىپپىن, انا كىسى مەنى ارى قاراي باسىمنان, دەنەمنەن تەپكىلەي بەرگەن ەكەن. سول جەردەگى ادامدار ارەڭ دەگەندە اراشالاپ العان”, – دەيدى دەپۋتات نۇرلان بايعازيەۆ.

دەپۋتات وزىنە تاپ بەرگەن ادامنىڭ قولىندا كاستەتكە ۇقساس زات بولعانىن جانە بۇل ارەكەتتى وزىنە جاسالعان قاستاندىق بولۋى مۇمكىن ەكەنىن اتاپ ءوتتى.

“رەزونانستى ىستەرمەن اينالىسىپ جۇرگەن سوڭ مۇنى قاساقانا جاسالدى ما دەپ ويلايمىن”, – دەيدى ول.

دارىگەرلەر وعان بەت سۇيەگى سىنعانىن, وتا جاساتۋ كەرەك ەكەنىن ايتقان.

جامبىل وبلىستىق پوليتسيا دەپارتامەنتى وكىلدەرى كۇدىكتى ۇستالىپ, پوليتسياعا جەتكىزىلگەنىن حابارلادى.

«بۇل فاكت بويىنشا قىلمىستىق كودەكستىڭ 293-بابىنىڭ 1-بولىگى  – «بۇزاقىلىق» بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. وقيعاعا قاتىسى بار ادام انىقتالىپ, پوليتسياعا جەتكىزىلدى. قازىرگى ۋاقىتتا قىلمىستىق ءىس بويىنشا وقيعانىڭ ءمان-جايىن جان-جاقتى جانە وبەكتيۆتى انىقتاۋعا باعىتتالعان تەرگەۋ جانە جەدەل-ىزدەستىرۋ شارالارى جۇرگىزىلۋدە», — دەدى پوليتسەيلەر.

الايدا دەپۋتات جۋرناليستەرگە بەرگەن سۇحباتىندا پوليتسەيلەر كۇدىكتىنى جىبەرە سالعانىن, ول اۋرۋحاناعا بارىپ قىسىم كورسەتپەك بولعانىن ايتتى.

ەسكە سالساق, بۇعان دەيىن ىلە اۋدانىنىڭ ءماسليحات دەپۋتاتى نۇرلان بايعازيەۆ الماتى وبلىسىنىڭ يۋۆەنالدى پوليتسيا قىزمەتكەرلەرى 17 جاستاعى قىزدى ايالدامادا توقتاتىپ, ونى قىزمەتتىك كولىكپەن جەتكىزىپ سالۋدى ۇسىنعان ءساتىنۆيدەوعا ءتۇسىرىپ, الەۋمەتتىك جەلىگە جۇكتەگەنىن جازعان ەدىك. وسى وقيعا ءۇشىن ءبىر پوليتسەي ىشكى ىستەر ورگاندارىنان جۇمىستان بوساتىلىپ, ەكىنشىسى لاۋىزىمىنان تومەندەتىلگەن.