بەتىن كۇيىك شالعان قىز جۇمىسقا ورنالاسا الماي ءجۇر

فوتو: اشىق دەرەككوز

الەۋمەتتىك جەلىدە سىرتقى كەلبەتىنىڭ كەلىستى بولماعانى ءۇشىن جۇمىسقا تۇرا الماي جۇرگەن بويجەتكەن مۇڭىن شاقتى, دەپ حابارلادى qandastar.kz  Alash.kz سايتىنا سىلتەمە جاساپ.

مەنى ەشكىم جۇمىسقا المايدى. نە سەبەپتى ەكەنى تۇسىنىكتى شىعار. بىردە مەن جۇمىسقا تۇرۋ ءۇشىن حابارلاسقاندا ولارعا بەتىمدى كۇيىك شالعانىن, تىرتىق ىزدەرى بارىن ەسكەرتتىم. ولار نە بولسا دا كەلۋىمدى ايتتى. تاڭەرتەڭ بارعانىمدا “بارا بەرىڭىز, ۇيگە قايتقانىڭىز دۇرىس” دەپ شىعارىپ سالدى. ارينە, قىزمەتكەردىڭ سىمباتتى بولۋى كەرەك ەكەنىن بىلەمىن جانە تۇسىنەمىن. بىراق ادامداردى بۇلاي شەتتەتۋ دۇرىس ەمەس دەپ ويلايمىن, – دەيدى جەلى قولدانۋشىسى.

بەتىنىڭ كۇيىك شالعانىنا جانى كۇيزەلگەن بويجەتكەن ادامداردىڭ ءبىر-بىرىنە تۇسىنىستىكپەن قاراعانىن قالايدى.

جۇمىس ىزدەپ سويلەسىپ, حابارلاسقاندا جۇزىمدە كۇيىك ىزدەرى بارىن ايتامىن. ولار بىردەن قابىلداي المايتىنىن ايتادى نەمەسە مۇلدەم جاۋاپ بەرمەيدى. قازىرگى زاماندا كۇيىك ىزدەرى, تىرتىعى بار ادامدارعا جۇمىس تابۋ قيىن. قوعامدىق تاماقتاناتىن ورىنداردا ادام كوپ بولاتىنىن جانە وندا ءتۇرلى ادام جۇرەتىنىن تۇسىنەمىن. بىراق ادامدار ادامگەرشىلىككە سالىپ, ءبىر-ءبىرىنىڭ جاعدايىن ءتۇسىنۋ كەرەك دەپ ويلايمىن. بەتىمدەگى تىرتىقتاردا تۇرعان ەشتەڭە جوق دەپ سانايمىن. مەنىڭ قول-اياعىم ساۋ, جۇمىس ىستەي الامىن, سويلەيمىن, ەستيمىن, – دەيدى اشىنعان جەلى قولدانۋشىسى.