Betin kúıik shalǵan qyz jumysqa ornalasa almaı júr

Foto: ashyq derekkóz

Áleýmettik jelide syrtqy kelbetiniń kelisti bolmaǵany úshin jumysqa tura almaı júrgen boıjetken muńyn shaqty, dep habarlady qandastar.kz  Alash.kz saıtyna silteme jasap.

Meni eshkim jumysqa almaıdy. Ne sebepti ekeni túsinikti shyǵar. Birde men jumysqa turý úshin habarlasqanda olarǵa betimdi kúıik shalǵanyn, tyrtyq izderi baryn eskerttim. Olar ne bolsa da kelýimdi aıtty. Tańerteń barǵanymda “Bara berińiz, úıge qaıtqanyńyz durys” dep shyǵaryp saldy. Árıne, qyzmetkerdiń symbatty bolýy kerek ekenin bilemin jáne túsinemin. Biraq adamdardy bulaı shettetý durys emes dep oılaımyn, – deıdi jeli qoldanýshysy.

Betiniń kúıik shalǵanyna jany kúızelgen boıjetken adamdardyń bir-birine túsinistikpen qaraǵanyn qalaıdy.

Jumys izdep sóılesip, habarlasqanda júzimde kúıik izderi baryn aıtamyn. Olar birden qabyldaı almaıtynyn aıtady nemese múldem jaýap bermeıdi. Qazirgi zamanda kúıik izderi, tyrtyǵy bar adamdarǵa jumys tabý qıyn. Qoǵamdyq tamaqtanatyn oryndarda adam kóp bolatynyn jáne onda túrli adam júretinin túsinemin. Biraq adamdar adamgershilikke salyp, bir-biriniń jaǵdaıyn túsiný kerek dep oılaımyn. Betimdegi tyrtyqtarda turǵan eshteńe joq dep sanaımyn. Meniń qol-aıaǵym saý, jumys isteı alamyn, sóıleımin, estımin, – deıdi ashynǵan jeli qoldanýshysy.