«بەتىنەن ۇرىپ, مۇرنىن قاناتقان»: اقتاۋدا وگەي اكە بالالارىنا اياۋسىز قورلىق كورسەتكەن

ماڭعىستاۋ وبلىسىنىڭ تۇرعىنى تۋرال لاتيفوۆ بۇرىنعى جۇبايى مەن ونىڭ بىرگە تۇراتىن جولداسىن بالالارعا قيانات جاسادى دەپ ايىپتادى. ول الەۋمەتتىك جەلىدە بەينەجازبا جاريالاپ, التى جاسار قىزىنىڭ جانايقايىن كورسەتتى, دەپ حابارلايدى Qandastar.kz

بەينەجازبادا كىشكەنتاي قىز اناسىنىڭ جولداسى, «اعاسى رۋسلان» دەپ اتايتىن ەر ادام, ونى بىرنەشە رەت بەتتەن ۇرىپ, ءتىپتى مۇرنىنان قان كەتكەنىن ايتادى. سونداي-اق ول ءتۇن ورتاسىندا ساباق وقۋعا ماجبۇرلەيتىنىن, ال ۇيىقتاپ كەتسە, باسىن سۋعا تولى شەلەككە باتىرىپ وياتاتىنىن جاسىرماي جەتكىزگەن.

تۋرال لاتيفوۆتىڭ ايتۋىنشا, ونىڭ ەكى قىزى بار: ۇلكەنى – 9 جاستا, كىشىسى – 6 جاستا. ولاردىڭ قورلىق كورىپ جۇرگەنىن ول بۇرىننان سەزگەن. اكە سوزىنشە, ءتىپتى 16 جاستاعى وگەي ۇلى دا شىداماي, اناسىنان قاشىپ كەتكەن. ءجاسوسپىرىم وگەي اكەسى مەن اناسىنىڭ وزىنە دە اۋىر سوزدەر ايتىپ, جۇمىسقا جەگىپ, ۇرىپ-سوققانىن اكەسىنە ايتىپ بەرگەن.

بۇل وقيعاعا قاتىستى ماڭعىستاۋ وبلىسىنىڭ پوليتسيا دەپارتامەنتى قىلمىستىق ءىس قوزعادى. تەرگەۋ «كامەلەتكە تولماعانداردى تاربيەلەۋ جونىندەگى مىندەتتەرىن ورىنداماۋ» بابى بويىنشا ءجۇرىپ جاتىر. قازىرگى تاڭدا بارلىق تاراپتان تۇسىنىكتەمە الىنىپ, ءىس باسشىلىقتىڭ ەرەكشە باقىلاۋىنا الىنعان.

بالالاردىڭ تاعدىرىنا الاڭداعان اكە:

«قازىر قىزدارىم مەنىڭ قاسىمدا. بىراق ولاردى اناسىنا قايتارادى دەپ قورقامىن. ويتكەنى پوليتسەيلەردىڭ وزدەرى زاڭ ادەتتە انانىڭ جاعىندا تۇرادى دەگەندى اشىق ايتتى», – دەيدى.

جاعدايعا ماڭعىستاۋ وبلىستىق كامەلەتكە تولماعاندار ءىسى جونىندەگى كوميسسيا مۇشەسى ديليارا تۋرينا دا پىكىر ءبىلدىردى. ونىڭ ايتۋىنشا, رەسمي ارىز تۇسپەگەنىمەن, اكەنىڭ شاعىمى تىركەلىپ, وڭدەلگەن.