“بەتىنىڭ جارتىسىن تىككەن“. اقتاۋدا قىز بالانىڭ باسىنا فۋتبول قاقپاسى قۇلادى

فوتو: Massaget.kz/اياگوز ءىزباساروۆا

اقتاۋدا 12 جاستاعى قىز بالانىڭ باسىنا فۋتبول قاقپاسى قۇلاعان. ءجاسوسپىرىمنىڭ بەتىنىڭ تەڭ جارتىسىن تىگۋگە تۋرا كەلگەن, – دەپ حابارلايدى qandastar.kz Massaget.kz تىلشىسىنە سىلتەمە جاساپ.

وقىس وقيعا 2-شاعىناۋدانداعى 71-ءۇيدىڭ ماڭىندا, فۋتبول الاڭىندا بولعان. بۇل تۋرالى الەۋمەتتىك جەلىدە اقتاۋ قالاسىنىڭ تۇرعىنى ازامات سارسەنباەۆ جازدى.

بلوگەردىڭ سوزىنشە, وقيعا بولعان جەردە ويىن جانە فۋتبول الاڭدارىنىڭ توسەنىشى جاڭارتىلىپ جاتقان. الايدا مەردىگەر كومپانيا فۋتبول قاقپالارىن بەكىتپەي, قالدىرىپ كەتكەن. ال بالالار قاقپالاردى تۇرعىزىپ, ويناماق بولعان.

«5 مينۋت وتپەي, قاقپالاردىڭ ءبىرى 12 جاستاعى قىز بالانىڭ باسىنا قۇلاعان. ابىروي بولعاندا دارىگەرلەر ءجاسوسپىرىمدى امان الىپ قالدى», – دەيدى ول.

زارداپ شەككەن قىز وبلىستىق بالالار اۋرۋحاناسىنىڭ تراۆماتولوگيا بولىمشەسىنە جاتقىزىلعان. دارىگەرلەردىڭ ايتۋىنشا, ءجاسوسپىرىمنىڭ جاعدايى تۇراقتى اۋىر.

«جەتكىنشەككە ماڭداي سۇيەگى سىنۋى, ميدىڭ ورتاشا اۋىرلىقتاعى كونتۋزياسى دياگنوزى قويىلدى. ماڭدايى كوگەرگەن. جالپى جاعدايى تۇراقتى, ورتاشا اۋىر. كونسەرۆاتيۆتى ەمدەلىپ جاتىر», – دەيدى ماڭعىستاۋ وبلىستىق بالالار اۋرۋحاناسىنىڭ نەيروحيرۋرگ دارىگەرى ەربول كەنجەۆالوۆ.