«بەزدارنايا»: اۆتوبۋستا بەلگىسىز ايەل اۋتيزمگە شالدىققان 6 جاسارعا قىزعا ءتىل تيگىزگەن

الەۋمەتتىك جەلىدە تاراعان ۆيدەودا قوعامدىق كولىكتە ايەل ادامنىڭ اۋتيزمگە شالدىققان بالا مەن ونىڭ اناسىنا دورەكى سويلەپ, بالاعات سوزدەر ايتقانى بەينەلەنگەن, دەپ جازدى Qandastsr.kz.

جەلى قولدانۋشىلارى بۇل ارەكەتكە نارازىلىق ءبىلدىرىپ, انا مەن بالاعا قولداۋ تانىتىپ جاتىر.

كادرلاردان ايەلدىڭ بالانى «بەزدارنايا» دەپ, اناسىنا كيىمىنە بايلانىستى ەسكەرتۋ جاساعانى كورىنەدى.

بالانىڭ اناسى بولسا, قىزىنىڭ اۋتيزمگە شالدىققانىن ايتىپ, تۇسىنىستىك تانىتۋدى سۇرايدى.

اۋتيزمگە شالدىققان 6 جاسار انيسانىڭ اناسى ساعينانىڭ ايتۋىنشا, ولار كۇن سايىن اۆتوبۋسپەن قاتىنايدى, سەبەبى جەكە كولىگى جوق, ال ينۆاتاكسي شاقىرۋ مۇمكىن بولماي قالعان كۇندەر ءجيى كەزدەسەدى.

«بۇرىن قىزىم اۆتوبۋسقا مىنۋگە قورقاتىن, قاتتى ايقايلاپ, ەدەنگە جاتىپ الاتىن. قازىر ەم-دومنىڭ ارقاسىندا تىنىشتالا باستادى, تەك ءبىر ءسوزدى قايتالاپ ايتادى. بىراق بۇل دا كەيبىر جولاۋشىلارعا ۇنامايدى. بۇگىن ءبىر ايەل قىزىما «بەزدارنىي» دەپ ءتىل تيگىزدى. بۇل مەنىڭ جۇرەگىمە قاتتى ءتيدى», – دەيدى اناسى.

ساعينا قىزىن قوعامدىق ورتادا تۇسىنىسپەۋشىلىكتەن قورعاۋ ءۇشىن ونىڭ كيىمىنە ارنايى توسبەلگى تاعىپ قويعان.

وندا «مەن ءوزىمدى جامان ۇستامايمىن, مەن ەركە ەمەسپىن. مەندە اۋتيزم. ءوتىنىش, سابىرلىراق بولىڭىزدارشى» دەپ جازىلعان.

وقيعا جەلى قولدانۋشىلارىنىڭ نارازىلىعىن تۋدىرىپ, كوپشىلىك دورەكىلىك تانىتقان ايەلدى جازالاۋدى تالاپ ەتۋدە. كەيبىر ازاماتتار ءوز تاجىريبەلەرىمەن ءبولىسىپ, ەرەكشە بالا تاربيەلەپ وتىرعان اتا-انالارعا قولداۋ ءبىلدىردى