Bıbisara Asaýbaeva 25 myń dollar tabys tapty

Foto: Ashyq derekkóz

21 jastaǵy qazaqstandyq grossmeıster Bıbisara Asaýbaeva Samarqandta (О́zbekstan) ótken bedeldi FIDE Women’s Grand Swiss 2025 týrnırinde úshinshi oryndy ıelendi. Bul – qazaqstandyq shahmatshy qyzdardyń «Úlken Shveıarııa» dodasyndaǵy eń úzdik nátıjesi, — dep habarlaıdy qandastar.kz 1bol.kz-ke silteme jasap.

Asaýbaeva sheshýshi sońǵy týrǵa deıin jeńis úshin kúresti. 11-týrdaǵy ýkraınalyq Anna Mýzychýkpen (2535) kezdesý teń aıaqtalyp, Bıbisara 7,5 upaı jınady. Bul kórsetkish oǵan senimdi túrde úshinshi oryndy ıelenip, 25 myń dollar (shamamen 13,5 mln teńge) kóleminde júlde alýǵa múmkindik berdi.

Týrnırde 8 upaı jınaǵan úndistandyq Vaıshalı Rameshbabý jeńimpaz atandy. Ol osylaısha 2023 jylǵy jetistigin qaıtalady. Ekinshi oryn 8 upaı enshilegen reseılik Katerına Lagnoǵa buıyrdy.

Qazaqstandyq shahmatshylardyń nátıjesi:

• Bıbisara Asaýbaeva (2505) — 7,5 upaı, 3-oryn ($25 000)
• Merýert Kamalıdenova (2349) — 6 upaı, 19-oryn ($3 000)
• Elnaz Kalıahmet (2299) — 5 upaı, 37-oryn, áıelder grossmeısteri normasyn oryndady
• Ksenııa Balabaeva (2383) — 5 upaı, 40-oryn

Bul jetistik Bıbisaraǵa 2026 jylǵy úmitkerler týrnırine qatysýǵa múmkindik beretin mańyzdy reıtıngtik upaılar jınaýǵa jol ashty. Qazirgi tańda ol álemdik shahmat arenasynda Anna Mýzychýk, Leı Tınze jáne Harıka Dronavallı sekildi myqtylarmen ıyq tirestirip tur.