ءبىلىم بەرۋ ۇيىمدارى باسشىلارى مەن ولاردىڭ ورىنباسارلارىنىڭ جالاقىسى قايتا قارالاتىن بولادى – مينيستر

جيىن بارىسىندا ورتا ءبىلىم بەرۋدىڭ وزەكتى ماسەلەلەرى مەن وزىق تاجىريبەنى تاراتۋعا ارنالعان «زاماناۋي مەكتەپتى باسقارۋ: ترەندتەر مەن بولاشاق» تاقىرىبىندا سەمينار ۇيىمداستىرىلدى. ديالوگ الاڭىندا باسشىلارعا ءبىلىم بەرۋ ساپاسىن ارتتىرۋ باعىتىندا مەملەكەت تاراپىنان اتقارىلىپ جاتقان مىندەتتەر مەن شارالار تۋرالى ايتىلدى. اتاپ ايتقاندا, بالالاردىڭ قاۋىپسىزدىگىن قامتاماسىز ەتۋ, جايلى ورتا قۇرۋ, تسيفرلاندىرۋ, ءتيىمدى تاربيە جۇمىسىن ۇيىمداستىرۋ, ينكليۋزيۆتى ءبىلىم بەرۋ جانە ت.ب. ماسەلەلەر ءسوز بولدى. بۇدان كەيىن كەزدەسۋ TEDx فورماتىندا جالعاستى. وعان وقۋ-اعارتۋ ءمينيسترى عاني بەيسەمباەۆ قاتىسىپ, وتاندىق ءبىلىم بەرۋ جۇيەسىن دامىتۋدىڭ نەگىزگى باعىتتارىنا توقتالدى.

پەداگوگتەردى كاسىبي دامىتۋ جۇيەسى تۇبەگەيلى وزگەرىپ جاتىر. قازىرگى تاجىريبەلى توپ-مەنەدجەرلەر «بولاشاق» باعدارلاماسى بويىنشا شەتەلگە تاعىلىمدامادان وتۋگە جىبەرىلەتىن بولادى. پەداگوگتەردى قولداۋ شارالارى جالعاسادى. وسى جىلدان باستاپ ءبىلىم بەرۋ قىزمەتكەرلەرىن كوتەرمەلەۋ جۇيەسى, سونداي-اق ءبىلىم بەرۋ ۇيىمدارى باسشىلارى مەن ولاردىڭ ورىنباسارلارىنىڭ جالاقىسى قايتا قارالاتىن بولادى, – دەدى مينيستر.

كەزدەسۋگە بارلىعى 800-گە جۋىق مەكتەپ, ءبىلىم بولىمدەرى مەن باسقارمالارىنىڭ باسشىلارى قاتىستى. كۇنى بويى ولار مەنەدجەردىڭ باسقارۋ قۇزىرەتتەرى, كادرلىق الەۋەتتى دامىتۋ, نقا قابىلدايتىن جانە ءبىلىم بەرۋ سالاسىنداعى ماڭىزدى باسىمدىقتار بويىنشا تاجىريبە الماسىپ, ءبىلىم الدى.

ەسكە سالا كەتسەك, بۇل – مەكتەپ ديرەكتورلارىمەن وتكەن قورىتىندى كەزدەسۋ. بۇنداي باسقوسۋلار بۇعان دەيىن ەلىمىزدىڭ باتىس, سولتۇستىك, شىعىس جانە وڭتۇستىك وڭىرلەرىندە وتكەن بولاتىن.