ءبىلىم سالاسىنداعى بىلىقتى جايىپ سالعان ۇستاز جۇمىسسىز قالدى

فوتو: جەكە قورىنان

الماتى قالاسىنىڭ د.باباەۆ اتىنداعى N115 جالپى ءبىلىم بەرەتىن مەكتەبىنىڭ بىلىكتى ۇستازى- مەيرامگۇل بارقازاتقىزى ءبىلىم جۇيەسىندەگى بىلىقتى باق جانە الەۋمەتتىك جەلىدە ايتقانى ءۇشىن 25 جىل ىستەگەن جۇمىسىنان شىعارىلدى, دەپ جازدى qandastar.kz

ءىستىڭ انىق-قانىعىمەن Orda.kz تىلشىسى تانىستى.مەيرامگۇل بارقازاتقىزى – الماتى قالاسىنىڭ د.باباەۆ اتىنداعى N115 جالپى ءبىلىم بەرەتىن مەكتەبىندە 1999 جىلدىڭ قاراشاسىنان بەرى جۇمىس ىستەپ كەلە جاتقان بىلىكتى ۇستاز. 2024 جىلى 2 مامىردا پەداگوگ زەينەت جاسىنا تولدى. وقۋ جىلىن اياقتاپ ەڭبەك دەمالىسىنان كەيىن, تامىزدىڭ 30-ى كۇنى مەكتەپ ديرەكتورى كەلەسى وقۋ جىلىنا مەيرامگۇلمەن ءبىر جىلدىق ەڭبەك شارتىنا قول قويدى. الايدا جىلدىڭ ورتاسىندا مەكتەپ اكىمشىلىگى زەينەتكەرلەرمەن ەڭبەك شارتىن بۇزامىز دەپ شەشىپ, مەيرامگۇل جۇمىسىنان شىعارىلدى.

«وقۋ جىلى باستالعالى بەرى ەسكەرتۋ المادىم, ەڭبەك ءتارتىبىن بۇزعان جوقپىن, سەبەپسىز جۇمىستان قالماعانمىن. جەلتوقسان ايىندا زەينەتكەرلەرمەن ەڭبەك شارتىن بۇزامىز دەگەن حابارلاما كەلدى. مەنەن باسقا مەكتەپتە بەس زەينەتكەر بار, بىراق جەلتوقساننىڭ بەسى كۇنى ولاردى كاسىپوداق قورعاپ قالىپ, ولار جۇمىسقا قايتا ورالدى, ال مەن جۇمىستان شىعارىلدىم. سەبەبى مەن ەكى جىلدان بەرى كاسىپوداق مۇشەسى ەمەسپىن»,دەپ شەرىن تارقاتتى ۇستاز.

ەڭبەك شارتىن بۇزۋ تۋرالى بۇيرىقتا مەكەمە باسشىسى قر ەڭبەك كودەكسىنىڭ 52 بابىنىڭ 1-تارماعى 24-تارماقشاسىنا (زەينەتكەرلىك جاسقا بايلانىستى ەڭبەك شارتىن بۇزۋ) سۇيەنەدى. الايدا مەيرامگۇلدەن باسقا بۇل مەكتەپتە زەينەت جاستاعى تاعى بەس مۇعالىم قىزمەت اتقارادى.

«مەكتەپ باسشىلىعى زەينەت جاسىنا قاتىستى باپتارعا سۇيەنىپ وتىر. ەگەر بۇل ەڭبەك شارتىندا و باستا «جاڭا مامان كەلگەنگە دەيىن» نەمەسە «ۋاقىتشا» دەگەندەي  بەلگىلى ءبىر مەرزىمگە جاسالعان ەڭبەك شارتى بولاتىن ەدى. ال بۇل ەڭبەك شارتى بيىلعى تامىزدا اياقتالادى. مەيرامگۇلگە قاتىستى ەشقانداي تارتىپتىك جازا تاعايىندالعان جوق, ءوز جۇمىسىن دۇرىس اتقارىپ كەلە جاتتى, اياق استىنان جۇمىستان شىعارۋعا قانداي قاجەتتىلىك بولعانى تۇسىنىكسىز. كاسىپوداقتا بولسا دا, بولماسا دا زاڭ بارلىعىنا بىردەي»,دەيدى ۇستازدىڭ ادۆوكاتى مارجان اسپاندياروۆا.

ۇستاز جۇمىسىنان ايىرىلۋىن باق-نا بەرگەن سۇحباتتارى مەن الەۋمەتتىك پاراقشاسىنا جاريالاعان جازبالارىمەن بايلانىستىرادى. جازبالارىندا مەيرامگۇل ءبىلىم سالاسىنداعى كەمشىلىكتەر مەن قاتەلىكتەردى سىناپ جازعان, ال بۇل مەكتەپ اكىمشىلىگىنە ۇناماعان بولۋى ءتيىس.

«ايتپاڭىز, جازباڭىز دەپ اۋىزشا ديرەكتور تاراپىنان ايتىلدى. مەن پىكىرىمنىڭ نەگىزى بار ەكەنىن دالەلدەپ بەردىم. ودان سوڭ ۇندەمەدى. ارىپتەستەرىم دە جەلىگە جازبا دەپ ايتقان. بىراق بۇل وقۋشىنىڭ ءبىلىم الۋىنا كەدەرگى كەلتىرگەن, دۇرىس ۇيىمداستىرىلماعان شارا بولعاندىقتان, بىرنەشە رەت جازۋعا تۋرا كەلدى»,دەدى مۇعالىم.

«دۇرىس ۇيىمداستىرىلماعان شارا» دەپ مەيرامگۇل بارقازاتقىزى 2024-2025 وقۋ جىلىندا ەنگىزىلگەن «نىسانالى مەكتەپ» جوباسىن ايتادى. «نىسانالى مەكتەپ» – ارتتا قالعان نەمەسە كەمشىلىكتەرى كوپ مەكتەپتەردى دامىتۋ جانە قايتا جانداندىرۋ. جوبا اياسىندا قازاقستان بويىنشا 943 مەكتەپ ىرىكتەلدى. تاڭدالىپ الىنعان مەكتەپتەردىڭ پەداگوگتەرىنە ارناپ بىلىكتىلىكتى ارتتىرۋ كۋرستارى ۇيىمداستىرىلعان. الايدا ءدال وسى كۋرستاردىڭ ۇيىمداستىرىلۋى سىن كوتەرمەيدى.

«مودۋلدەردەن (كۋرستاردان) ءوتۋ ۋاقىتىن مۇعالىمدەر ءوزى تاڭدامايدى. جوعارى جاقتان وقۋ جىلىنىڭ باسىندا بەلگىلى ءبىر ۋاقىت بەرىلەدى. مىسالى, ۋاقىت 9:30 بەلگىلەنسە, مۇعالىم ساباق بەرىپ جاتسا دا 9:30 دا كىرىۋى قاجەت. ساباق بەرىپ جاتقان مۇعالىم Zoom-دى قوسىپ قويادى دا, ارى قاراي وقۋشىلارمەن جۇمىس ىستەۋدى جالعاستىرادى. مودۋل اياقتالعان سوڭ تەستىلەۋ بولادى, ءمودۋلدى تىڭداماعان مۇعالىم, ارينە, تەستىلەۋدەن وتە المايدى. پەداگوگ بىرنەشە ارەكەتتەردە تومەن كورسەتكىش كورسەتسە جۇمىستان شىعارىلادى. قازىر ورلەۋدە ارناۋلى كۋرس اشىلۋى كەرەك ەدى, ەنگەنىن-ەنبەگىنىن مەن بىلمەيمىن»,  دەيدى مەيرامگۇل بارقازاتقىزى.

«نىسانالى مەكتەپ» جوباسى سوڭىنا دەيىن ويلاستىرىلماعان, كەمشىلىكتەرى كوپ جوبا دەيدى ۇستاز. وقىلىقتارى تەك مۇعالىم جۇمىسىنا عانا ەمەس, بالالاردىڭ دا ءبىلىم الۋ پروتسەسىنە كەدەرگى بولاتىنىن ايتادى.

ەسەپسىز قايىرىمدىلىق

وقۋ جىلىنىڭ ەكىنشى توقسانىندا مەكتەپ ديرەكتورىنىڭ ايتۋىمەن ەرىكتى What’sApp توبى قۇرىلدى. سول چاتتا مەكتەپ مۇعالىمدەرى ەرىكتىنىڭ ءموبيلدى اۋدارىمى ارقىلى جەكە نومىرىنە اقشانى ەرىكتى تۇردە سالىپ وتىرادى. جينالعان قاراجاتقا جەتىم, الەۋمەتتىك جاعدايى ناشار بالالارعا ازىق-ت ۇلىك, كيىم الىپ, اقشالاي-زاتتاي بەرىلەدى دەپ سەندىرەدى.

«توپتى ديرەكتوردىڭ ايتۋىمەن اشتى. اقشانى ەرىكتى جينايدى. كۇنىنە مولشەرى 15-20 داي ادام «+» قويادى,  بىراق قانشا سالاتىنى بەلگىسىز»,دەيدى پەداگوگ.

«مەيىرىمدىلىك جاقسى. ساداقانىڭ دا ساۋابى بار. بىراق شوت اشىلماعان, ەسەبى انىق ەمەس. مەنىڭشە بۇل از قاراجات بولسا دا ەسەپ اشىلىپ, اقشا سوعان ءتۇسىپ, ەسەبىن جاسايتىن كوميسسيا بولۋى كەرەك», – دەدى مەيرامگۇل بارقازاتقىزى.

رەداكتسيا ەرىكتىمەن بايلانىسقا شىعىپ, قوردىڭ قىزمەتى, مۇعالىمدەر چاتىنا قالاي قوسىلعانى جايلى اقپارات الۋعا تىرىستى. الايدا, ەرىكتى قانداي دا ءبىر اقپارات بەرۋدەن جالتارىپ, ءبىزدى بۇعاتتاپ تاستادى.

مەيرامگۇل بارقازاتقىزى جۇمىستان شىققان كۇنى, مەكتەپتىڭ كەلىسىم كوميسسياسىنا ءوتىنىش جازدى. كوميسسيا وتىرىسى ءوتىنىش تۇسكەن كۇننەن 15 كۇن ىشىندە قارالىپ, وتكىزىلۋى كەرەك ەدى, جاڭا جىلدىق مەرەكەلەرگە بايلانىستى وتكىزۋ كۇنى 22 قاڭتارعا بەكىتىلدى. الايدا جۋرناليستەردىڭ قاتىسۋىنا قارسى بولعان كوميسسيا مۇشەلەرى, جينالىستى 23 قاڭتارعا اۋىستىردى. كوميسسيا وتىرىسى مەكتەپ قابىرعاسىندا بەس مۇعالىمنىڭ قاتىسۋىمەن وتكىزىلدى. شەشىمى ءۇش كۇننىڭ ىشىندە بەلگىلى بولادى.

كوميسسيانىڭ شەشىمىمەن مەكتەپ ديرەكتورىنىڭ №86 بۇيرىعى قايشى ەمەس دەپ تانىلىپ, بۇيرىق وزگەرىسسىز قالدى.