ءبىلىم سالاسىنىڭ قىزمەتكەرلەرى 130 ملن تەڭگە جىمقىرعان

فوتو: اشىق دەرەككوز

الماتى وبلىسىنىڭ ەڭبەكشىقازاق اۋداندىق سوتى بالقاش اۋدانىنىڭ ءبىلىم ءبولىمىنىڭ باسشىسى د. اقمولداەۆاعا جانە وسى ءبولىمنىڭ 8 بۋحگالتەرىنە قاتىستى ۇكىم شىعاردى, دەپ حابارلايدى qandastar.kz

ولار 129,6 ملن تەڭگە سوماسىندا بيۋدجەت قاراجاتىن وزىنە ارتىق جالاقى اۋدارۋ ارقىلى جىمقىرعانى ءۇشىن كىنالى دەپ تانىلدى.

اقمولداەۆا مەملەكەتتىك قىزمەتتە قىزمەت اتقارۋعا ءومىر بويىنا تىيىم سالا وتىرىپ, 8 جىل 6 ايعا باس بوستاندىعىنان ايىرىلدى.

بۋحگالتەرلەرگە مەملەكەتتىك قىزمەتتە 3 جىلدان 10 جىلعا دەيىن قىزمەت اتقارۋعا تىيىم سالىنىپ, 2 جىلدان 8 جىلعا دەيىن باس بوستاندىعىنان ايىرۋ جانە شەكتەۋ جازاسى تاعايىندالدى.

تۋرا وسىلاي «تالدىقورعان قالاسىنىڭ №12 ورتا مەكتەبى» كمم بۋحگالتەرلەرى وزدەرىنە بەلگىلەنگەن نورمادان جوعارى جالاقى اۋدارۋ ارقىلى 24,5 ملن تەڭگە سوماسىندا بيۋدجەت قاراجاتىن جىمقىرعانى ءۇشىن كىنالى دەپ تانىلدى.