ءبىر-ءبىرىن جاقتىرماعان: تەمىرتاۋدا فەلدشەر قىزدى جۇمىس ورنىندا ارىپتەسى ۇرىپ تاستادى

فوتو: جەلى كادرلارىنان 

تەمىرتاۋدا فەلدشەر قىزدى جۇمىس ورنىندا ارىپتەسى ماس كۇيىندە كەلىپ ۇرىپ تاستاعان. بويجەتكەن مي جاراقاتى, ساۋساقتىڭ سىنۋى مەن ءتۇرلى كوگەرۋ جاراقاتىمەن اۋرۋحاناعا ءتۇستى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

وقيعا 13 ءساۋىر كۇنى كەشكە بولعان. جەرگىلىكتى جۇرت جازعانداي, ەر ادام ماس كۇيىندە قىزبەن «سويلەسۋگە» بارعان. ول 30 جاستاعى فەلدشەرگە جەدەل جاردەم ستانتسياسىنىڭ اۋماعىندا كەزەكشىلىك كەزىندە شابۋىل جاساعان. 29 جاستاعى ەر ادام سول كەزدە ەڭبەك دەمالىسىندا بولسا, جۇمىس ورنىنا كەلىپ قىزدى تۇنشىقتىرىپ قۇلاتقان, ۇرىپ-سوعىپ, شاشىنان سۇيرەگەن. ارىپتەستەرى ونى ارەڭ سۇيرەپ اراشا تۇسكەن.

دەرەكەتەرگە سۇيەنسەك, فەلدشەر قىز ەر ادامنىڭ سۇيىكتىسىنىڭ قۇربىسى بولعان. ول فەلدشەرگە “قۇربىسىنا وزىمەن ايىرىلىسۋعا كەڭەس بەرىپ ءجۇر” دەپ شابۋىلداعان.

جابىرلەنۋشى مي جاراقاتى مەن شايقالۋى, ساۋساقتىڭ سىنۋى جانە كوپتەگەن كوگەرۋ جاراقاتىمەن اۋرۋحاناعا جاتقىزىلدى. كەلەسى كۇنى شابۋىلداۋشى دا سول اۋرۋحاناعا ءۇش بەلگىسىز ادامنىڭ وسى جاعدايدان كەيىن ءوزىن ۇرعانىن ايتىپ تۇسكەن. كەيىنىرەك ەر ادام اۋرۋحانادان ءوز ەركىمەن كەتىپ قالعان.

پوليتسيا 29 جاستاعى كۇدىكتىنىڭ ۇستالعانىن جانە بولىمشەگە جەتكىزىلگەنىن حابارلادى. ولاردىڭ ايتۋىنشا, جانجال قىزمەتكەرلەردىڭ ءبىر-ءبىرىن جاقتىرماۋىنان باستالعان. مۇنىڭ جۇمىسقا قاتىسى جوق ەكەنى ايتىلدى. قازىر قىلمىستىق ءىس قوزعالىپ, تەرگەۋ ءجۇرىپ جاتىر. ەكەۋى ەمدەلگەن سوڭ ساراپتاما تاعايىندالادى.