ء«بىر يىسكەگەننەن ءولىپ كەتەدى»: قازاقستاندىق جاسوسپىرىمدەر جاڭا قاۋىپتى ترەند باستادى

فوتو: ۆيدەودان سكرين

قازاقستاندا جاسوسپىرىمدەر اراسىندا “كاربيك” دەپ اتالاتىن جاڭا قاۋىپتى ترەند پايدا بولدى. ولار اۆتوكولىك كاربيۋراتورىن تازالايتىن سۇيىقتىقتى يىسكەپ, ەسىرتكى شەككەنگە ۇقساس اسەر الادى.

بۇل تۋرالى qandastar.kz اقپارات اگەنتتىگى 31-ارنانىڭ ينفورمبيۋرو جاڭالىقتار قىزمەتىنە سىلتەمە جاساپ حابارلايدى.

مۇنداي اەروزولدى باللونداردى تابۋ وتە وڭاي, باعاسى دا قولجەتىمدى. ونىڭ قۇرامىندا اتسەتون, مەتيل ءسپيرتى, تولۋول جانە كومىرسۋتەكتەر بار. ونى يىسكەگەندەر ەسىرتكى شەككەنگە ۇقساس اسەر الادى. كاربيۋراتورلاردى تازالاۋعا ارنالعان بۇل ۋلى زاتتار تىنىس الۋ جولدارى ارقىلى اعزاعا ەنىپ, ۋلاندىرىپ, اۋىر اسقىنۋلارعا, ءتىپتى ولىمگە اكەلۋى مۇمكىن دەيدى ماماندار.

“بۇل زات ەڭ الدىمەن تىنىس الۋ جۇيەسىنە جۇكتەمە سالادى. ياعني وكپەگە, كەيىن جۇرەك-قان تامىرلارى اۋرۋلارىنا, ءتۇرلى استماعا سەبەپ بولۋى مۇمكىن – ءبارى وسىدان زارداپ شەگەدى», – دەيدى بالالار پسيحولوگى گالينا مۋرزاباەۆا.

«كاربيكتىڭ» ارزان بولعاندىقتان وعان كوبىنە جاسوسپىرىمدەر مەن بالالار اۋەس. پسيحولوگتاردىڭ ايتۋىنشا, ولاردى بۇل قاۋىپتى ادەتكە يتەرمەلەيتىن سەبەپتەر – قاتارلاستارى اراسىندا ءوزىن دۇرىس كورسەتۋدىڭ جولىن تابا الماۋى, تەزىرەك ەرەسەك بولۋعا ۇمتىلۋ.

«بۇرىن بەنزين, جەلىم سياقتى زاتتار قولدانىلاتىن. ال قازىر وتتىقتار, تۇرمىستىق گاز سياقتى زاتتار دا پايدا بولدى. جاڭا سينتەتيكالىق ەسىرتكىلەردىڭ دامۋىمەن قاتار توكسيكومانيا سالاسىندا دا قولدانىلاتىن زاتتاردىڭ ءتۇرى كوبەيىپ جاتىر», – دەيدى پسيحيكالىق دەنساۋلىقتىڭ رەسپۋبليكالىق عىلىمي-پراكتيكالىق ورتالىعى» رمك فيليالىنىڭ ديرەكتورى شايزات تلەۋباەۆا.

دەنساۋلىق ساقتاۋ مينيسترلىگىنىڭ مالىمەتىنشە, ناركولوگيالىق ەسەپتە 150-دەن استام بالا تىركەلگەن. ونىڭ 100-ءى – الكوگولگە تاۋەلدى, 51-ءى – ەسىرتكىگە تاۋەلدى, تاعى 11-ءى – توكسيكومانياعا شالدىققان. بۇل – نەگىزىنەن 15-17 جاس ارالىعىنداعى جاسوسپىرىمدەر. بىراق بۇل رەسمي كورسەتكىشتەر عانا. ناركولوگتار مەن پوليتسيانىڭ نازارىنا ىلىكپەگەندەردىڭ سانى الدەقايدا كوپ بولۋى ىقتيمال.

“كوبىنەسە بۇل 5-9 نەمەسە 12-15 جاس ارالىعىنداعى بالالار. مۇنداي بالالاردى اتا-انالارى نەمەسە مۇعالىمدەرى اكەلەدى. سەبەبى بالا اشۋشاڭ بولا باستايدى, وقۋعا دەگەن قىزىعۋشىلىعى جوعالادى, سىرتقى كەلبەتىنە ءمان بەرمەي كەتەدى جانە تاعى باسقالار بەلگىلەر بايقالادى”, – دەيدى ناركولوگ دارىگەر اراي ازىمبەكقىزى.

بالانىڭ ۋلى زاتتى قولداناتىنىن كورسەتەتىن بەلگىلەرى بار. اتاپ ايتقاندا, ونىڭ دەنەسىنەن بوگدە, وتكىر حيميالىق ءيىس شىعادى. سونىمەن قاتار, مىنەز-قۇلقى مەن سويلەۋىندەگى وزگەرىستەرگە دە نازار اۋدارۋ كەرەك. ەيفوريادان اگرەسسياعا دەيىنگى كوڭىل-كۇيدىڭ جىلدام اۋىسۋى – تىيىم سالىنعان زاتتاردى قولدانۋدىڭ تاعى ءبىر بەلگىسى دەپ ەسكەرتتى ماماندار.