جاڭالىقتار
«ءبىر ءتىسى جوق ادامعا برەكەت ورناتقان»: وتباسى بانك زەينەتاقى اقشاسىنا نەگە ءتىس ەمدەۋگە بولمايتىنىن ءتۇسىندىردى
فوتو: istockphoto.com
وتباسى بانكى “ۇكىمەت وسى سەبەپتى ءتىس ەمدەۋگە ارنالعان زەينەتاقى تولەمىن ۋاقىتشا توقتاتۋ تۋرالى شەشىم شىعاردى” دەپ تۇسىندىرەدى.
ويتكەنى 2024 جىلدىڭ وزىندە ەمدەلۋگە 435,1 ملرد تەڭگە بىرجولعى زەينەتاقى تولەمدەرى پايدالانىلعان. بۇل سومانىڭ شامامەن 98% ستوماتولوگيالىق قىزمەتتەرگە كەتكەن. دەگەنمەن ەمدەلۋگە جۇمساعان بىرجولعى زەينەتاقى تولەمدەرىن تەكسەرۋ كەزىندە قارجىنى ماقساتسىز پايدالانۋ جاعدايلارى انىقتالعان. ياعني كەيبىر كلينيكالار زەينەتاقى جيناقتارىن قولما-قول اقشا تۇرىندە شىعارىپ الۋعا كومەكتەسكەن.
بانك بۇل فاكتىلەردى قالاي انىقتاعان:
-ستوماتولوگيالىق كلينيكالاردىڭ ورنالاسۋ مەكەنى كليەنتتەردىڭ تۇراتىن جەرىنە جانە مەديتسينالىق تىركەۋگە سايكەس كەلمەگەن;
-كلينيكا كليەنتى بولدىق دەگەن ازاماتتار ونى كورسەتىلگەن ستوماتولوگيالىق قىزمەتتەر الۋ تۋرالى انىقتامالارمەن راستاماعان;
-بىرقاتار كليەنت وزدەرىنىڭ زەينەتاقى تولەمدەرىن ەشقانداي ستوماتولوگيالىق قىزمەت الماي, دەلدالدار ارقىلى جانە اقشالاي سىياقى تولەپ العاندارىن تۇسىندىرگەن;
-بزت قاراجاتى ەسەبىنەن ەمدەلۋ ءۇشىن, مىندەتتى قۇجاتتاردىڭ تىزبەسىنە كىرەتىن, ازاماتتاردىڭ مەديتسينالىق تىركەلگەن جەرى بويىنشا دارىگەرلىك كوميسسيالاردىڭ قورىتىندىلارىندا قول قويۋعا قۇقىعى جوق سونداي-اق دارىگەرلىك كوميسسيانىڭ مۇشەلەرى بولىپ تابىلمايتىن, ءتىپتى مەديتسينالىق مەكەمەدە جۇمىس ىستەمەيتىن ادامداردىڭ قولدارى تۇرعان.
