جاڭالىقتار
ء«بىر جىل بويى قاراجات جينادىق»: ماڭعىستاۋلىق اكەنىڭ 10 قىزى مەرەيتويىنا پاتەر سىيلاپ, كوپشىلىكتى ءتانتى ەتتى
فوتو: جاقسىگۇل شالعىنقىزىنىڭ جەكە ارحيۆىنەن
ماڭعىستاۋلىق شالعىن وتەعۇلوۆقا 60 جاس مەرەيتويىنا وراي 10 قىزى پاتەر سىي̆لادى. مۇنداي توسىنسىي كوپشىلىكتىڭ كوڭىلىنەن شىعىپ, حالىقتىڭ ىقىلاسىنا بولەندى, دەپ جازدى qandastar.kz
اۋلەتتىڭ ۇلكەن قىزى جاقسىگۇل شالعىنعىزى Stan.kz تىلشىسىنە پاتەرگە قالاي اقشا جيناعاندارىن, توسىنسىيدى ومىردەگى ەڭ جاقىن ادامداردى قالاي قابىلداعانىن ايتىپ بەردى.
جاقسىگۇل شالعىنقىزى تاياۋدا اكەلەرىنىڭ 60 جىلدىق مەرەيتويىن ەرەكشە ءارى ەستە قالارلىقتاي ەتىپ تويلاعاندارىن ايتادى. وتباسىنداعى 10 قىز بەن 1 ۇل جۇمىلا جابىلىپ, تويدى جاقسى وتكىزۋگە تىرىسقان.
«2021 جىلى اكەمىزگە LADA Niva كولىگىن سىيلاعان ەدىك, سول كەزدە بۇل جاڭالىق الەۋمەتتىك جەلىگە تاراپ, كوپشىلىكتىڭ نازارىن اۋدارعان. الايدا ءبىز ەشقاشان «جۇلدىز بولايىق» دەگەن نيەتتى كوزدەگەن ەمەسپىز, ءبارىن اكەمىزدىڭ قۋانىشى ءۇشىن جاسادىق. ويتكەنى ءبىز – قاراپايىم اۋىلداعى وتباسىدان شىققان, ءبىر-بىرىنە سۇيەۋ بولعان ون ءبىر پەرزەنتپىز. اتا-انامىز دا, وزدەرى ايتقانداي, داڭعازالىقتى ەمەس, قاراپايىم ءومىردى قالايدى. پەرزەنتتەرى اقىلداسا كەلە, بۇل مەرەيتويدى ەرەكشە ەستە قالارلىقتاي ەتۋگە بەل بۋدىق. ءبىر جىل بويى دايىندالىپ, ارقايسىمىز شاما-شارقىمىزشا قاراجات جينادىق», – دەدى جاقسىگۇل شالعىنقىزى.
ۇيدەگى ۇلكەن قىزداردىڭ قولى بوساماي, اقتاۋدان ءۇيدى ىزدەۋگە ەگىز سىڭلىلەرى ءامينا مەن ءالينا اتسالىسقان ەكەن.
«بۇل ءۇيدى اتا-انامىزعا توسىنسىي رەتىندە سىيلاۋدى شەشتىك. بۇعان دەيىن قىزدار ءبىر بولمەلى ءۇي الىپ بەرگەن ەدى, وندا قازىر قىزداردىڭ ءوزى تۇرىپ جاتىر. اتا-انامىزدىڭ اۋىلدا قارايتىن مالى بار دەگەن سەكىلدى. سوندىقتان جاستارى كەلگەندىكتەن اراسىندا “قالاعا كەلىپ قارالىپ, دەمالىپ كەتسىن” دەپ ءۇي سىيلادىق. ودان بولەك, انامىزعا التىن بىلەزىك تارتۋ ەتتىك», – دەدى جاقسىگۇل شالعىنقىزى.
فوتو: جاقسىگۇل شالعىنقىزىنىڭ جەكە ارحيۆىنەن
ءۇيدىڭ ۇلكەنى ۇيگە ناقتى قانشا تەڭگەدەن جيناعاندارى قۇپيا بولىپ قالسىن دەيدى. دەسە دە, اتا-انالارىنا ارنالعان توسىنسىيدى جوعارى دەڭگەيدە وتكىزۋ ءۇشىن ءبىراز شىعىندالعانىن مويىندادى.
«توي كەزىندەگى ۇساق-تۇيەك سىيلىقتار, ۆيدەووپەراتور مەن موبيلوگرافتىڭ قىزمەتى بار. مۇنىڭ بارىنە 700 مىڭ تەڭگەدەن جينادىق. قالعان قاراجاتتىڭ ءبارى ۇيگە جۇمسالدى. بۇل ءۇشىن بۇرىننان بەرى اسىقپاي جيناق ساندىقشا اشىپ, بىرتىندەپ جيناپ جۇرگەنبىز. پاتەردى وسى جىلدىڭ ءساۋىر ايىندا ساتىپ الدىق, ال كىلتىن 14 ماۋسىمدا اتا-انامىزعا سالتاناتتى تۇردە تابىستادىق. ەكى اي بويى بۇل جاڭالىقتى ەشكىمگە ايتپاي, قۇپيا ساقتاپ كەلدىك. جاستارى كەلگەن اكە-شەشەمىزدىڭ قالادا دا جايلى ءومىر سۇرگەنىن قالاپ, پاتەردىڭ ءىشىن تولىقتاي جاڭادان جاساقتادىق», – دەدى ءۇيدىڭ ۇلكەنى.
جاقسىگۇل شالعىنقىزى اكە-شەشەسىنىڭ بۇل كۇن ولاردىڭ ومىرىندەگى كۇتپەگەن ءسات بولعانىن ايتادى. انالارى قۋانىشتان كوزىنە جاس العان ەكەن. بالالارى دا سىيلىقتى تاپسىرار الدىندا قاتتى قوبالجىپ, قۋانىشتان جۇرەگى دۇرسىلدەگىنىن اتاپ ءوتتى.
«انامىزدىڭ بۇدان شوك الىپ قالعانى سونشالىق «سەندەردەن كوپ نارسەنى كۇتۋگە بولادى ەكەن. سەندەردەن قورقۋ كەرەك ەكەن» دەپ قالدى. ءالى ءتۇسىم سياقتى, بوتەن ۇيدە وتىرعان سياقتىمىن» دەپ تاڭدانىسىن جەتكىزدى. ءسويتىپ توي بولار كۇننەن ءبىر كۇن بۇرىن جاڭا ۇيگە بارىپ داستارحان جاساپ قويدىق. مەيرامحانادان شىققاننان كەيىن بىردەن سول جاققا بارايىق دەپ ازىرلەدىك. كەيىن بارلىق تۋعان-تۋىس بولىپ سول ۇيگە باردىق. وسىدان سوڭ حالىقتىڭ ىقىلاسىنا بولەنىپ, اكە-شەشەمىزدى تورگە وتىرعىزىپ, توي وتكىزدىك. جانىمىزدا اكە-شەشەمىز امان-ەسەن جۇرگەنىنە اللاعا مىڭ دا ءبىر شۇكىر دەيمىز», – دەپ جاقسىگۇل شالعىنقىزى اعىنان جارىلدى.
تولقىن مەن شالعىن وتەعۇلوۆتار قاراپايىم ەڭبەك ادامدارى ەكەن. اكەسى بۇرىن وڭىردەگى قالامقاس كەن ورنىندا جۇمىس ىستەپ, قازىر اۋىل مەكتەبىندە كۇزەتشى بولىپ قىزمەت اتقارىپ ءجۇر. ال انالارى دا سول مەكتەپتە ۆاحتا قىزمەتكەرى بولىپ جۇمىس ىستەيدى. قىزىنىڭ ايتۋىنشا, اتا-اناسى – بار ءومىرىن بالا تاربيەسىنە, ادال ەڭبەككە ارناعان جاندار.
«مۇنداي ۇلكەن ءىس-شارانى جاساۋ ەڭ اۋەلى, اللانىڭ قولداۋى, ودان كەيىن جولداستارىمىزدىڭ, اتا-ەنەمىزدىڭ قولداۋىنىڭ ارقاسى. ەرلەرىمىز بىزگە سەنىپ, باستامامىزدى قولدادى, دەمەۋ بولدى. اسىرەسە ءوز جولداسىمنىڭ دەمەۋىن ەرەكشە اتاپ وتكىم كەلەدى. اتا-ەنەمىز دە يدەيانى جىلى قابىلداپ, رۋحاني جاعىنان قولداپ وتىردى. اكە-شەشەمىزدىڭ كوزى تىرىسىندە قادىرىن ءبىلىپ, قۋانىش سىيلاۋ – ەڭ ۇلكەن پارىز. قاراپايىم عانا اۋىلدىڭ قىزدارى بولساق تا, بىرىكسەك, تاۋدى دا قوزعاي الاتىنىمىزعا تاعى ءبىر مارتە كوزىمىز جەتتى», – دەدى جاقسىگۇل شالعىنقىزى.
فوتو: جاقسىگۇل شالعىنقىزىنىڭ جەكە ارحيۆىنەن
ايتا كەتەيىك, ءۇيدىڭ ۇلكەنى جاقسىگۇل شالعىنقىزىنىڭ جاسى 37-دە. ەڭ كەنجەلەرى 16 جاستاعى سۇيەنىش.
«ماڭعىستاۋ وبلىسى, ماڭعىستاۋ اۋدانى, قىزان اۋىلىندا تۇرامىز. ءوزىم مۇعالىممىن. ۇيدە كوبى قىز بالا بولعان سوڭ اتا-انامىز ءبارىمىزدى مۇعالىم ماماندىعىندا وقىتتى. تەك ءبىر قىز مادەنيەت سالاسىندا, ياعني اۋىلدا مادەنيەت ءۇيىنىڭ ديرەكتورى بولىپ قىزمەت اتقارادى. باۋىرلارىمنىڭ اتى-ءجونى ايگۇل, اسەل, تەڭگە, ۇلدانا, نۇرلاندىق, ءامينا-ءالينا ەسىمدى ەگىزدەر, شاتتىق, ەلنۇرى, ءىنىم سۇيەنىش», – دەپ تولىقتىردى جاقسىگۇل شالعىنقىزى.
