«Bir jyl boıy qarajat jınadyq»: Mańǵystaýlyq ákeniń 10 qyzy mereıtoıyna páter syılap, kópshilikti tánti etti

Foto: Jaqsygúl Shalǵynqyzynyń jeke arhıvinen

Mańǵystaýlyq Shalǵyn О́teǵulovqa 60 jas mereıtoıyna oraı 10 qyzy páter syı̆lady. Mundaı tosynsyı kópshiliktiń kóńilinen shyǵyp, halyqtyń yqylasyna bólendi, dep jazdy qandastar.kz

Áýlettiń úlken qyzy Jaqsygúl Shalǵynǵyzy Stan.kz tilshisine páterge qalaı aqsha jınaǵandaryn, tosynsyıdy ómirdegi eń jaqyn adamdardy qalaı qabyldaǵanyn aıtyp berdi.

Jaqsygúl Shalǵynqyzy taıaýda ákeleriniń 60 jyldyq mereıtoıyn erekshe ári este qalarlyqtaı etip toılaǵandaryn aıtady. Otbasyndaǵy 10 qyz ben 1 ul jumyla jabylyp, toıdy jaqsy ótkizýge tyrysqan.

«2021 jyly ákemizge LADA Niva kóligin syılaǵan edik, sol kezde bul jańalyq áleýmettik jelige tarap, kópshiliktiń nazaryn aýdarǵan. Alaıda biz eshqashan «juldyz bolaıyq» degen nıetti kózdegen emespiz, bárin ákemizdiń qýanyshy úshin jasadyq. О́ıtkeni biz – qarapaıym aýyldaǵy otbasydan shyqqan, bir-birine súıeý bolǵan on bir perzentpiz. Ata-anamyz da, ózderi aıtqandaı, dańǵazalyqty emes, qarapaıym ómirdi qalaıdy. Perzentteri aqyldasa kele, bul mereıtoıdy erekshe este qalarlyqtaı etýge bel býdyq. Bir jyl boıy daıyndalyp, árqaısymyz shama-sharqymyzsha qarajat jınadyq», – dedi Jaqsygúl Shalǵynqyzy.

Úıdegi úlken qyzdardyń qoly bosamaı, Aqtaýdan úıdi izdeýge egiz sińlileri Ámına men Álına atsalysqan eken.

«Bul úıdi ata-anamyzǵa tosynsyı retinde syılaýdy sheshtik. Buǵan deıin qyzdar bir bólmeli úı alyp bergen edi, onda qazir qyzdardyń ózi turyp jatyr. Ata-anamyzdyń aýylda qaraıtyn maly bar degen sekildi. Sondyqtan jastary kelgendikten arasynda “qalaǵa kelip qaralyp, demalyp ketsin” dep úı syıladyq. Odan bólek, anamyzǵa altyn bilezik tartý ettik», – dedi Jaqsygúl Shalǵynqyzy.

Foto: Jaqsygúl Shalǵynqyzynyń jeke arhıvinen

Úıdiń úlkeni úıge naqty qansha teńgeden jınaǵandary qupııa bolyp qalsyn deıdi. Dese de, ata-analaryna arnalǵan tosynsyıdy joǵary deńgeıde ótkizý úshin biraz shyǵyndalǵanyn moıyndady.

«Toı kezindegi usaq-túıek syılyqtar, vıdeooperator men mobılograftyń qyzmeti bar. Munyń bárine 700 myń teńgeden jınadyq. Qalǵan qarajattyń bári úıge jumsaldy. Bul úshin burynnan beri asyqpaı jınaq sandyqsha ashyp, birtindep jınap júrgenbiz. Páterdi osy jyldyń sáýir aıynda satyp aldyq, al kiltin 14 maýsymda ata-anamyzǵa saltanatty túrde tabystadyq. Eki aı boıy bul jańalyqty eshkimge aıtpaı, qupııa saqtap keldik. Jastary kelgen áke-sheshemizdiń qalada da jaıly ómir súrgenin qalap, páterdiń ishin tolyqtaı jańadan jasaqtadyq», – dedi úıdiń úlkeni.

Jaqsygúl Shalǵynqyzy áke-sheshesiniń bul kún olardyń ómirindegi kútpegen sát bolǵanyn aıtady. Analary qýanyshtan kózine jas alǵan eken. Balalary da syılyqty tapsyrar aldynda qatty qobaljyp, qýanyshtan júregi dúrsildeginin atap ótti.

«Anamyzdyń budan shok alyp qalǵany sonshalyq «Senderden kóp nárseni kútýge bolady eken. Senderden qorqý kerek eken» dep qaldy. Áli túsim sııaqty, bóten úıde otyrǵan sııaqtymyn» dep tańdanysyn jetkizdi. Sóıtip toı bolar kúnnen bir kún buryn jańa úıge baryp dastarhan jasap qoıdyq. Meıramhanadan shyqqannan keıin birden sol jaqqa baraıyq dep ázirledik. Keıin barlyq týǵan-týys bolyp sol úıge bardyq. Osydan soń halyqtyń yqylasyna bólenip, áke-sheshemizdi tórge otyrǵyzyp, toı ótkizdik. Janymyzda áke-sheshemiz aman-esen júrgenine Allaǵa myń da bir shúkir deımiz», – dep Jaqsygúl Shalǵynqyzy aǵynan jaryldy.

Tolqyn men Shalǵyn О́teǵulovtar qarapaıym eńbek adamdary eken. Ákesi buryn óńirdegi Qalamqas ken ornynda jumys istep, qazir aýyl mektebinde kúzetshi bolyp qyzmet atqaryp júr. Al analary da sol mektepte vahta qyzmetkeri bolyp jumys isteıdi. Qyzynyń aıtýynsha, ata-anasy – bar ómirin bala tárbıesine, adal eńbekke arnaǵan jandar.

«Mundaı úlken is-sharany jasaý eń áýeli, Allanyń qoldaýy, odan keıin joldastarymyzdyń, ata-enemizdiń qoldaýynyń arqasy. Erlerimiz bizge senip, bastamamyzdy qoldady, demeý boldy. Ásirese óz joldasymnyń demeýin erekshe atap ótkim keledi. Ata-enemiz de ıdeıany jyly qabyldap, rýhanı jaǵynan qoldap otyrdy. Áke-sheshemizdiń kózi tirisinde qadirin bilip, qýanysh syılaý – eń úlken paryz. Qarapaıym ǵana aýyldyń qyzdary bolsaq ta, biriksek, taýdy da qozǵaı alatynymyzǵa taǵy bir márte kózimiz jetti», – dedi Jaqsygúl Shalǵynqyzy.

Foto: Jaqsygúl Shalǵynqyzynyń jeke arhıvinen

Aıta keteıik, úıdiń úlkeni Jaqsygúl Shalǵynqyzynyń jasy 37-de. Eń kenjeleri 16 jastaǵy Súıenish.

«Mańǵystaý oblysy, Mańǵystaý aýdany, Qyzan aýylynda turamyz. О́zim muǵalimmin. Úıde kóbi qyz bala bolǵan soń ata-anamyz bárimizdi muǵalim mamandyǵynda oqytty. Tek bir qyz mádenıet salasynda, ıaǵnı aýylda mádenıet úıiniń dırektory bolyp qyzmet atqarady. Baýyrlarymnyń aty-jóni Aıgúl, Ásel, Teńge, Uldana, Nurlandyq, Ámına-Álına esimdi egizder, Shattyq, Elnury, inim Súıenish», – dep tolyqtyrdy Jaqsygúl Shalǵynqyzy.