ءبىر جىلدىق ينتەرناتۋرا جاراماي قالعان: ءال-فارابي اتىنداعى ۇلتتىق ۋنيۆەرسيتەت تۇلەكتەرى رەزيدەنتۋراعا تۇسە الماي تىعىرىققا تىرەلدى

فوتو: اشىق دەرەككوز

الماتىداعى ءال-فارابي اتىنداعى قازاق ۇلتتىق ۋنيۆەرسيتەتىنىڭ مەديتسينا فاكۋلتەتىن 6 جىل وقىعان تۇلەكتەر رەزيدەنتۋراعا تۇسە الماي قالدى. سەبەبى ولاردى وزگە مەديتسينالىق جوعارى وقۋ ورىندارى ءبىر جىلدىق ينتەرناتۋرا جەتكىلىكسىز دەپ قابىلداماي قويعان.

مۇنى ەستىگەن ۇلتتىق ۋنيۆەرسيتەتتى كەلەسى جىلى بىتىرەتىن ستۋدەنتتەر دە دابىل قاعىپ وتىر. ويتكەنى ناقتى ءبىر سالاعا بەيىمدەلگەن دارىگەر بولۋ ءۇشىن ولارعا رەزيدەنتۋرا اسا قاجەت. ال دەنساۋلىق ساقتاۋ مينيسترلىگى جاستاردىڭ ەكى ورتادا سابىلۋىنا ۋنيۆەرسيتەتتى كىنالادى. بۇل تۋرالى Stan.kz اقپارات اگەنتتىگى كتكارناسىنا سىلتەمە جاساپ حابارلايدى.

دارىگەر بولۋدى اڭساپ, ال-فارابي اتىنداعى قازاق ۇلتتىق ۋنيۆەرسيتەتىنىڭ مەديتسينا فاكۋلتەتىنە وقۋعا تۇسكەنجاستار مامان يەسى اتانۋ جولىندا كەدەرگىگە تاپ بولىپ وتىر. بەس جىلدىق باكالاۆردى, ارتىنشا ءبىر جىلدىق ينتەرناتۋرانى بىتىرگەن تۇلەكتەر بيىل رەزيدەنتۋراعا تۇسە الماي, تىعىرىققا تىرەلىپتى. وزگە مەديتسينالىق جوعارى وقۋ ورىندارى ۇلتتىق ۋنيۆەرسيتەت تۇلەكتەرى ينتەرناتۋرانى جەتكىلىكسىز وقىعان دەپ وتىر.

ء“بىر جىلدىق ينتەرناتۋرالارىڭىز جارامسىز, ەكىنشى جىل بارىپ وقىپ كەلىڭىزدەر” دەپ وتىر. ديپلوم قولدارىندا, مەملەكەتتىك ۇلگىدە. ديپلوم مەملەكەتتىك قۇجات, ونى قوقىسقا تاستاپ, ەكىنشى جىل وقي بەرەيىك دەگەن نارسە دۇرىس ەمەس, پروتسەدۋرا بۇزىلادى, زاڭ بۇزىلادى”, – دەدى ۋنيۆەرسيتەت تۇلەگى ايدانا پازىلبەك.

ۇلتتىق ۋنيۆەرسيتەتتى كەلەر جىلى ءتامامدايتىن 80 ستۋدەنت دە قازىردەن دابىل قاعىپ وتىر. ويتكەنى رەزيدەنتۋراعا ءتۇسۋ بۇلارعا اسا ماڭىزدى. ونى وقىماسا, ناقتى ءبىر سالاعا بەيىمدەلگەن مامان بولا المايدى, تەك تاجىريبەلىك دارىگەر بولىپ قالادى ەكەن.

“مەنىڭ بەس جىلدىق وقۋىم زايا كەتپەك. سەبەبى ار جاعىندا مەن جالپى تاجىريبەلىك دارىگەر بولۋعا عانا قۇقىم قالىپ تۇر. جىلىنا 1 ميلليون 70 مىڭ تولەدىم. ينتەرناتۋرادا باعا ودان دا ۇلكەيەدى, 1 ميلليون 700 مىڭ سۇرايدى. مەن سونى تولەۋىم كەرەك. ونىڭ ۇستىنە ودان كەيىن جىلدار بويى تولەنگەن اقشاممەن ءارى قاراي مەن جەكە ماماندىق الا المايمىن”, – دەپ دابىل قاقتى تۇلەكتەردىڭ ءبىرى ءاليا قۇدايبەرگەن.

سويتسە قازاق ۇلتتىق ۋنيۆەرسيتەتى جاستاردى مەديتسينالىق ءبىلىم بەرۋدىڭ جاڭا ستاندارتىمەن وقىتىپتى. سوعان سايكەس باكالاۆردان كەيىن وقىلاتىن ينتەرناتۋرا ءبىر جىلعا قىسقارتىلعان. ەندى وقۋ ورنىنىڭ باسشىلىعى ءوز تۇلەكتەرىنىڭ رەزيدەنتۋراعا قابىلدانۋىن سۇراپ, دەنساۋلىق ساقتاۋ مينيسترلىگىنە حات جولداعان.

“حات جازدىق, ناتيجەسىن كۇتىپ وتىرمىز. ەگەر دە مينيسترلىكتىڭ “وقىت” دەگەن شەشىمى بولسا, وندا ءبىز تاعى ءبىر جىل وقىتۋعا دايىنبىز. سەبەبى بالالار ءبارى ءبىر جىل اقىلى تۇردە وقىدى. ەندى تاعى ءبىر جىل وقىت دەسە, وقىتامىز”, – دەدى قازۇۋ اكادەميالىق ماسەلەلەر جونىندەگى پرورەكتورى التاي قازماعامبەتوۆ.

دەنساۋلىق ساقتاۋ مينيسترلىگى جاستارعا مەرزىمىنەن بۇرىن ديپلوم بەرگەن ۋنيۆەرسيتەتتى ايىپتادى. سەبەبى بۇل تۇلەكتەر وقۋعا تۇسكەن كەزدەگى تالاپقا سايكەس 7 جىل تولىققاندى ءبىلىم الۋى كەرەك ەكەن.

ء“بىلىم تۋرالى زاڭعا سايكەس, ولار ۋنيۆەرسيتەتتى وقۋعا تۇسكەن كەزدەگى باعدارلاما بويىنشا اياقتاۋى كەرەك. سول كەزدە 7 جىل وقۋى كەرەك دەپ بەلگىلەنگەن بولسا, سول 7 جىلدى تولىققاندى وقىپ شىعۋعا تيىس. كەيىنىرەك قولدانىسقا ەنگەن باعدارلامانىڭ بۇل تۇلەكتەرگە قاتىسى جوق. سوندىقتان ينتەرناتۋرانىڭ تاعى ءبىر جىلىن وقىپ كەلسىن. سودان كەيىن عانا رەزيدەنتۋراعا تۇسە الادى”, – دەدى دسم عىلىم جانە ادامي رەسۋرستار دەپارتامەنتىنىڭ مەديتسينالىق ءبىلىم باسقارماسىنىڭ باسشىسى اسەت ىزدەنوۆ.

ال تۇلەكتەر قاجەتتى ءبىلىمنىڭ ءبارىن ء«بىر جىل ىشىندە الىپ قويدىق» دەپ وتىر. ءارى تاعى ءبىر جىل اقىلى وقۋعا ەشقايسىنىڭ قۇلقى جوق. سوندىقتان قولدا بار ديپلوممەن رەزيدەنتۋراعا قابىلداۋدى تالاپ ەتەدى. ايتا كەتەيىك, ونىڭ ءوزىن تاڭداعان باعىتىنا قاراي, رەزيدەنتتەر 2 جىلدان 4 جىلعا دەيىن وقيدى.