«Birinshi bolyp qarsylas shebine kirip, avtomatpen oq jaýdyrdy»: Kemel Toqaevqa qatysty qupııa qujat jarııa etildi

Kemel Toqaevtyń erlikteri týraly egjeı-tegjeıli jazylǵan marapat paraqtary «Halyq jadysy» saıtynda ashyq qoljetimdi boldy.

«Birinshi bolyp qarsylas shebine basyp kirip, avtomatpen oq jaýdyryp, 5 nemisti joıdy»: Reseı Qorǵanys mınıstrligi Qazaqstan Prezıdentiniń ákesi Kemel Toqaev týraly muraǵat qujattaryn jarııalady, dep habarlaıdy qandastar.kz

Kemel Toqaevtyń erlikteri týraly egjeı-tegjeıli jazylǵan marapat paraqtary «Halyq jadysy» saıtynda ashyq qoljetimdi boldy.

«Bir nemisti jaralap, tutqynǵa alǵan. Tutqyndy ertip, óz bólimshesine qaıtyp kele jatqanda, Toqaev aıaǵynan jaryqshaǵy bar oqpen jaralandy… Jaraqatqa qaramastan, nemis tutqyndy atyp tastap, jarasyn tańyp alyp, óz tankilerine jetip úlgerdi», – delingen marapat paraǵynda.

 Skifnews.kz jazǵandaı, Gvardııa serjanty Kemel Toqaev 1945 jyly Polsha aýmaǵyndaǵy urysta kórsetken erekshe erligi úshin II dárejeli Otan soǵysy ordenimen marapattalǵan. Qujatta onyń batyrlyǵy men erik-jigeri egjeı-tegjeıli sıpattalady. Atap aıtqanda, 1945 jyldyń 21 qańtarynda Polshadaǵy Egleve eldi mekeninde nemis kúshteri tún ishinde kútpegen shabýyl jasaıdy. Osy sátte avtomatshylar tankterdi qorǵap, jaý shabýylyna qarsy shabýyl uıymdastyrady.

Gvardııa podpolkovnıgi Afanasıı Povarovtyń qoly qoıylǵan marapattaý paraǵynda Kemel Toqaevtyń erekshe erligi aıqyn kórsetilgen. Ol jaý shebine birinshi bolyp kirip, bes nemis sarbazyn atyp, bireýin tutqynǵa alǵan. Jaraqat alǵanyna qaramastan, tutqyndy qaýipsiz jetkizýge tyrysqanymen, aqyry ony atyp tastap, ózi tankige deıin jetip úlgergen.

Soǵystan keıin Kemel Toqaev keńestik Qazaqstannyń kórnekti tulǵalarynyń birine aınaldy. Ol — birneshe detektıv jáne tarıhı shyǵarmalardyń avtory, jýrnalıstıka men ádebıettiń damýyna eleýli úles qosqan qaıratker. Onyń shyǵarmashylyǵy qylmys pen ádilet, adamgershilik jáne patrıottyq qundylyqtar tóńireginde órbidi.

Kemel Toqaevtyń jaýyngerlik erligi men azamattyq ómiri búgingi Qazaqstan Prezıdenti Qasym-Jomart Toqaevtyń tulǵalyq qalyptasýyna zor áser etkeni anyq. Ult kóshbasshysynyń parasattylyǵy men baısaldy saıası baǵyty áke táliminen bastaý alatyny sózsiz.

Reseı Qorǵanys mınıstrliginiń bul qujaty — jeke adam taǵdyry arqyly tarıhty qaıta paıymdaýǵa múmkindik beredi. Ol bir otbasynyń ǵana emes, búkil halyqtyń jadyndaǵy batyrlyq pen otansúıgishtik rýhtyń aıǵaǵy. Qazaqstan qoǵamy úshin bul qujat tarıhı jadyny jandandyryp, jastarǵa úlgi bolarlyq qundy derek bolyp otyr.