ءبىرىنشى كەزدەسۋدە كوز جۇمعان بويجەتكەن: سوتتالۋشىنىڭ ۇكىمى وزگەردى

فوتو: اشىق دەرەككوز

قايعىلى وقيعا 2023 جىلدىڭ 16 قازانىندا بولعان. ايناگۇل كەنجەباەۆا جىگىتپەن جولىعىپ, ەكەۋى كافەدە اڭگىمەلەسىپ وتىرعان. سالدەن سوڭ جىگىت اشۋلانىپ, قىزعا قول جۇمساي باستاعان. جىگىتتى تىنىشتاندىرۋعا تىرىسقان بويجەتكەن, ودان تۇك شىقپاعان سوڭ 102-گە قوڭىراۋ سوعىپ, پوليتسيا شاقىرادى. كافەدە وتىرعاندار ولاردىڭ اراسىنداعى جانجالدى كورگەنىمەن, ەشكىم ارالاسپاعان. قىز بەن جىگىت ەسىك الدىنا شىققان سوڭ, جىگىت قىزدى قاتتى يتەرىپ جىبەرەدى. باسىمەن ارىققا سوعىلعان ايناگۇلدىڭ ميى شايقالىپ, سول جەردە كوز جۇمعان, – دەپ حابارلايدى qandastar.kz turkystan.kz-كە سىلتەمە جاساپ.

ءبىرىنشى ينستانتسيا سوتى «ابايسىزدا كىسى ءولتىرۋ» بابىمەن سوتتالۋشىعا 2,5 جىل جازا كەسكەن بولاتىن. بىراق جابىرلەنۋشى جاق بۇل ۇكىممەن كەلىسپەي, اپەللياتسيالىق شاعىم تۇسىرگەن.

الماتى قالالىق سوتىنىڭ قىلمىستىق ىستەر جونىندەگى سوت القاسى بۇل ءىس بويىنشا ۇكىمدى قايتا قارادى. ءىس ماتەريالدارىمەن تانىسقان سوت القاسى ءبىرىنشى ينستانتسيا سوتىنىڭ ۇكىمىنىڭ كۇشىن جويدى.

«سوت القاسىنىڭ قاۋلىسىمەن ازامات ت. ابايسىزدا كىسى ولىمىنە اكەلگەن, دەنساۋلىققا قاساقانا اۋىر زيان كەلتىرۋ بابى (قر قك 106-بابىنىڭ 3-تارماعى) بويىنشا كىنالى دەپ تانىلىپ, وعان 8 جىل باس بوستاندىعىنان ايىرۋ جازاسى تاعايىندالدى»-دەلىنگەن ءباسپاسوز حابارلاماسىندا.

قاۋلى زاڭدى كۇشىنە ەندى.