جاڭالىقتار
بىرقاتار قازاقستاندىقتارعا مىندەتتى الەۋمەتتىك مەديتسينالىق ساقتاندىرۋ جارناسى قايتارىلدى
فوتو: baq.kz
اقمولا پروكۋراتۋراسى مىندەتتى الەۋمەتتىك مەديتسينالىق ساقتاندىرۋ جارناسىن اۋدارۋدا بىرقاتار زاڭ بۇزۋشىلىقتار انىقتادى. بۇل تۋرالى Stan.kz اقپارات اگەنتتىگى حابارلايدى.
پروكۋراتۋرا مامس سالاسىنداعى زاڭدىلىقتىڭ جاي-كۇيىنە تالداۋ جۇرگىزدى.
“جۇمىس بەرۋشىلەر كوپبالالى (التىدان استام بالا تاربيەلەپ وتىرعان) انالاردان, ەرەكشە كۇتىمدى قاجەت ەتەتىن جانداردان جانە تولەمنەن بوساتىلعان كۇندىزگى بولىمدە وقيتىن ستۋدەنتتەردەن ءمامس جارناسىن نەگىزسىز ۇستاعانى انىقتالدى, – دەلىنگەن حابارلامادا.
مىسالى, كوپبالالى انانىڭ جۇمىس بەرۋشىسى الەۋمەتتىك مەديتسينالىق ساقتاندىرۋ قورىنا 31 243 تەڭگە اۋدارعان. ودان بولەك ەرەكشە كۇتىمدى قاجەت ەتەتىن ادامنان قوردىڭ پايداسىنا 82 306 تەڭگە مولشەرىندە جارنالار ۇستالعان. پروكۋراتۋرانىڭ مالىمەتىنشە, ءمۇنداي دەرەكتەر از ەمەس.
ناتيجەسىندە جەڭىلدەتىلگەن ساناتتاعى 436 قازاقستاندىققا زاڭسىز ۇستالعان اقشا قايتارىلدى. قايتارىلعان جارنانىڭ جالپى سوماسى 60 ميلليون تەڭگەدەن استى.
