جاڭالىقتار
بىرنەشە سەبەبى بار: پرەمەر-مينيستر دەپۋتاتتاردىڭ سىنىنا جاۋاپ بەردى
پرەمەر-مينيستر ولجاس بەكتەنوۆ ءوز مينيسترلەر كابينەتىنىڭ جۇمىسىنا, سونداي-اق ەكونوميكالىق كورسەتكىشتەردىڭ جەتكىلىكسىزدىگىنە قاتىستى دەپۋتاتتار سىنىنا جاۋاپ بەردى,-دەپ حابارلايدى Qandastar.kz
بۇگىن ۇكىمەت پارلامەنتتە 2023 جىلعا ارنالعان رەسپۋبليكالىق بيۋدجەتتىڭ اتقارىلۋى تۋرالى ەسەپ بەردى. كەيبىر دەپۋتاتتار مينيسترلەر كابينەتىن سىنعا الدى.
ولجاس بەكتەنوۆ پرەزيدەنتتىڭ ەكونوميكانىڭ ءوسۋى جونىندەگى تاپسىرمالارىن ەسكە سالىپ, كورسەتكىشتەرگە ءالى قولجەتكىزىلمەۋ سەبەپتەرىن اتاپ ءوتتى.
«مۇنداي ءوسۋ قارقىنىن قامتاماسىز ەتۋگە بىرنەشە پارامەترلەر كەدەرگى كەلتىرۋى مۇمكىن: بۇل كۇردەلى گەوساياسي جاعداي جانە ساۋدا سەرىكتەستەرىمىزدىڭ نارىعىنداعى جاعداي. بىراق سوعان قاراماستان, ۇكىمەت العا قويعان ماقساتقا جەتۋ ءۇشىن بارلىق رەزەرۆتىك مۇمكىندىكتى شوعىرلاندىرادى», — دەدى ول.
بۇل رەتتە پرەمەر-مينيستر تابىستى سالالاردى دا اتاپ ءوتتى. بۇل — قۇرىلىس, كولىك-لوگيستيكا, بايلانىس.
ء«بىز قازىر ساۋدادا كورسەتكىشتەردىڭ ءبىرشاما تومەندەگەنىن كورىپ وتىرمىز. بۇل, ارينە, سۋ تاسقىنى مەن باسقا كومپونەنتتەردىڭ سالدارى, بىراق بۇل كورسەتكىشتەردى بىرتىندەپ تۇراقتاندىرامىز. ءبىزدىڭ بولجامىمىز بويىنشا, ەكونوميكامىزدىڭ كەيبىر سالالارى ءوسۋ ءۇشىن ۇلكەن الەۋەتكە يە بولادى. بۇل قۇرىلىس, ينفراقۇرىلىم, جوندەۋ جۇمىستارى, سونداي-اق وڭدەۋ سالاسى. ۇكىمەت بۇل سالالاردى اۋقىمدى تۇردە قولدايدى», — دەدى بەكتەنوۆ.
